Seg tazwara n wayyur-a n yunyu bdan yisteqsiyen n yikayaden ttqabalen inelmaden n yiɣricen ineggura n yal aswir akken ad d-inin yigmaḍ ɣer taggara anwa yuklalen ad ibeddel aɣerbaz deg umaḍal d amaynut anwa uhu. Akken neẓra, yella-d ttiɛad amezwaru akked warrac n useggas wis semmus deg uswir amenzu ass n 2 deg yunyu. Syin akkin, tewweḍ-d nnuba n yisnawanen i yesɛeddan ABAK ass n 7 deg yunyu. Cwiṭ n wakud ɣer sdat, seg 14 ɣer 16 deg yunyu, ttwaseqfen yikayaden n taggara n useggas sɣur warrac n uswir alemmas i yesɛeddan akayad n taggara n tɣuri. Maca tura mi kfan yikayaden amek i ten-walan wid terza taluft? Daymi dɣa i ten-nesteqsa ɣef tmuɣliwin-nsen i d-ibanen dakken ur mgerradent aṭas. Maca deg wayen yerzan imeẓyanen, skud ala kraḍ n tangiwin (matières) i sɛeddan, i yellan d tusnakt, tafransist akked teɛrabt, kra n wid nesteqsa nnan-d dakken akayad-nsen yeshel d aman, dɣa ass n 17 seg yunyu i asen-d-rran igmaḍ deg internet. Maca seg uswir alemmas d asawen ur ssefraḥent tmuɣliwin i aɣ-d-yettwannan, inelmaden n useggas wis ukuẓ walan tuttriwin i asen-d-yettunefken qellunt d aqlaw. «Nekk seg tama-s ur ufiɣ ara aṭas n wuguren akken ad d-rreɣ i yisteqsiyen n ukayad s umata ɣas ma weɛren, maca akk inelmaden ttmeslayen ɣef wayen i d-yusan dakken ur as-zmiren». I aɣ-d-tenna tnelmadt A. Sawsa. Yuɣ lḥal, d tamawt yettemcabin i nufa ɣur wid yesɛeddan akayaḍ n UBAK, imi dɣa ddeqs seg-sen i yesḥassfen seg tuɛert n yisteqsiyen aseggas-a, almi i tt-gezmen di rray kra belli ma wwin-t-id d tamkerra (miracle) i yeḍran, mačči d kra nniḍen. Wiyaḍ sekren-d kra n lhul gar-asen seg tuccḍiwin i d-yellan aseggas-a deg kra n tangiwin am teɛrabt ed tefransist, ladɣa imi ugaden belli annect-nni ur as-yettwamaggay ara leḥsab ass n useɣti (correction). «Akayad n BAK ulac win ara d-yinin yeshel, rnu daɣen ulac win izemren ad yeḍmen seg tazwara arbaḥ neɣ d axsar axaṭer tikwal deg-s ula d zzher». Akka i aɣ-d-yenna yiwen n usnawan i yesɛeddan akayad-a n BAK netta yettbin deg wallen-is iḥar almi dayen melmi ara d-wayeḍ wass n 10 deg yulyu ideg ara d-rren igmaḍ s wudem unsib.
Mhenni Xalifi