Tazrigt tis snat n temliliyin n umezgun n useggas-a 2015, id-hegga tiddukla tadelsant Tiεwinin n Wizgan di tγiwant n Wizgan γef dema n wuggur n remḍan d tin yebdan tamedit n wass n 25 yunyu 2015 s wudem unṣib u d leqdic ara-yeddun γef teγzi n 10 wussan almi d 03 yulyu id-iteddun, s yiwen n wahil d amesbaγur anda i llant 12 n trebuεa meqren n umezgun n 04 lwilayat yemgaraden am Tizi-Wezzu, Tubiret, Bgayer d Wahran. Gar trebuεa-agi nezmer ad-nebder Tigejdit n Mεetqa s usentel Tagujilt ur neggujel d Imaḥbas, ifeḥcac n Ğerğer s usentel Mesmar Ğeḥḥa, macahu (Ifarḥunen) s usentel Yenna-yi Jeddi, asarhu n At-Yeğğar s usentel Xddem tafeḍ, Imγan n Uzeffun s usentel Amur-ik d ayen id-yemger ufus-ik, igersafen s usentel Ccix Laḥlu, Igawawen n At-Yiraten. D tirebuεa n umezgun n lwilaya n Tizi-Wezzu. Akken i llant trebuεa n umezgun n lwilayat niḍen am Tilawt s usentel Alexxart yedren akked Awaγlis s usentel Inebgi n Cciṭan n Cmini lwilaya n Bgayet, Tigawt d wawal n Wahran s usentel Tiγwist taneggarut akked tarbeεt n Yetran n Tqarbuzt n Tubiret s usentel Times. Aṭas n twaculin id-yussan s tuget γer tmesbanit-agi tadelsant, imi d tagnit yelhan i yimezdaγ d twaculin n tudrin n temnaḍt n Wizgan ttfarasen uḍan n remḍan, teksen lxiq, tettemlil tasa d way turew. Iswi n temliliyin-agi n umezgun, d aseqreb n umezgun γer tudrin n leqbayel, d usebγes n yelmeẓyen akken ad-kecmen annar-agi n umezgun s tahri imi d ababat n tẓuri i usnarni n yedles amazi&gamma,; akken i tella d tagnit yelhan i uzeṭṭa n tegmat d tdukli ger yemdanen.
Islam Bessaci