Gar iḥricen n tira mačči d izli n udmawen i yellan. Udmawen-agi ur ɛdilen-ara, yal wa aɣanib-is, ilugan –is , iswi-s akked imeɣṛiyen-is. Di tasekla s-umata( tamedyazt, amezgun, tullizin, ungalen) lebni n tira ibedd ɣef ccbaḥa n wawal, tugniwin , aḥiḥa n timenna. Lɣerḍ n umyaru ad yessiweḍ tikta-s s yiwen n tawil ara yeṭṭfen lbal ɣer-s akken win yeqqaren ad yekcem lɣerza n uḍṛis ur as iberru alamma yessaweḍ ɣer taggara-s. Maca tira deg aɣmisen temxallef, acku iswi amezwaru n umagrad aɣemsan ( article journalistique) d-asiweḍ n-isalen s tutlayt timserreḥt ara yegzu yal yiwen. Llsas n tira deg aɣmisen ibedd ɣef tlata n tuttriwin: “acu , anda , melmi” . D tlata n tuttriwin agi id telqa yessawaḍen aḍṛis ad ihatec deg timsal iḍeṛṛun di ddunit akken asali ad yemmeɣ ɣef medden, nnig waya ad fehmen ssebba-s d wayen yak id iccuden ɣer-s.Yal tameslayt tesɛa ilugan-is n tira, ɣef aya ur yeɛdil ara ad yaru umdan amagrad s teqbaylit am akken ara t –yaru s tutlayt-nniḍen acku yal tutlayt d amek tettɛebbi tidmi. Akken ad yaru umdan akken ilaq s teqbaylit ilaq ad yesɛu tidmi teqbaylit. Ma yella txuṣ tidmi-agi s teqbaylit lebni n wawal ad yuɣal dayen nniḍen, d-asxetrem ur nettwafhem. Ahat d wagi id ugur id tt-maggeren tuget n imesjarnan yettarun s teqbaylit ama deg “aɣmis n imaziɣen” neɣ deg aɣmis “tiɣremt”. Ɣef aya tuget n imeɣṛiyen ttlummun fell-aɣ tucdiwin deg lebni n wawal, n yifyar. Tikwal qqaren-aɣ-id aḍṛis ur yettwefhem-ara, ur iban ara lmeqsud yebɣa bab-is. Ahat aya yekka-d deg akken taqqa n ineɣmasen ur waɛan ara akken ilaq ad zdin tidmi s teqbaylit ɣer tira s teqbaylit. Ɣef aya nettaf amur ameqqran seg-sen ttxemmimen s trumit ttaren ɣer teqbaylit, din dɣa i ttemdarkalen ɣef ugur imi awal n teqbaylit yettɛebbi ṛuḥ n teqbaylit d aya-gi kan. Deg anect-a ur yelli id nesnulfa d amaynut imi akka yak i yella lḥal ɣer yal tameslayt( i yebɣun tili) awalen-is llan akken ad refden lɣerza n tidmi n imawlan-is. D-aya ahat a ara d yawin asteqsi amezwaru: amek ara d njab abrid ɣer tira tuɣmist mebla ma nḥur tameslayt n teqbaylit ɣef tidmi tajentaḍt?Lɛib ur yelli ara deg tmeslayt imi teqbaylit tezmer ad tini ayen id aɣ yehwanmebla ma nesexreb azeṭṭa-s( ungalen , tamedyazt tamirant, id tteffɣen taggara-agi d ttbut ɣef aya). Lexṣas yella deg imesjarnanen s timmad-nsen ur nessin ara ad snesren iman-nsen si rrebg n tutlayin nniḍen yal mi ara ddmen imru akken ad arun s teqbaylit.Uguren nniḍen id yettmagger uneɣmas( journaliste) s teqbaylit d amek ara yanni awalen yecqan tameddurt tatrart. Amawal n teqbaylit d aẓawali deg anect-a… xas ulamma amawal yexdem Mouloud Mammeri d akufi deg id nettawi ayen neḥwaj d irem( terme) akken a neddu d wakud deg nella. Tamara terra akken a nesxdem awalen-agi imaynuten( neologismes) acku awal n tineɣmest yerza akud atrar… maca tikwal asṭuqet deg awalen-agi ineqq lbenna n tutlalyt , yettarra-tt d ajenṭadt ɣef wid i tt-yeqqaren. Ahat yif-it lemmer s leḥder kan ara n ttleqqim tameslayt taqbaylit s wawalen agi imaynuten. Ahat yif-it a smenyaf n wawalen iqburen n teqbaylit izemren ad awin anamek atrar ɣef awalen-agi id nessukkus deg imawalen id yettlalen. Askasi yuklal a t-id negger s annar akken ad nezzi s tilist ɣef tunḍiwin yettilin, yesseɛraqen lewhi i tutlayt. Aṭas n wid yettarun smenyafen ad sxedmen awalen-agi imaynuten xas lḥawj ur yelli… kra n imeɣṛiyen ttlummun fell-aɣ qqaren-d : » ur nefhim-ara ( d amedya) ayen kra seg wid yettarun sexdamen awal n “ azwaw “ deg abdil n wawal “ aqbayli”? » …dayen-nni ahat i yeserwalen imeɣṛiyen ɣef iɣmisen s teqbaylit acku ineɣmasen tt-nadin tezdeg ( pureté ) n tutlayt ɣef rẓana( efficacité) n wawal… Deg ayen iccudden ɣer iɣeblan n tira tuɣmist s teqbaylit , asqamu unig n timuzɣa ( HCA) yessewwjed yiwet n timlilit s ddemma deg Beni Houa deg lwilaya n Chlef seg umenzu alamma d 5 septembre. S wacu ara d teglu timlilit-agi ḥedd ur yegzi.. maca xas akka d tikti n lɛali, tuttriwin ad grint ɛalqen’t: ayen deg Lwilya n Chlef ara d yilli ugraw-agi? Anda akka tella tneɣmast s tmaziɣt deg tamnaḍt-nni? Ayen anzalen( affiches ) id swejden s ddemma uran s yal tutlayt( taɛrabt, tafṛansist) bexlaf tamaziɣt? Ahat ad ilin kra ara s yinin tamawin-agi ( les remarques) ur sɛin-t ara azal, awid kan ad yili leqdic-agi , xuḍi win ur nezwar( s lxiṛ /lehṣen) deg iman-is( tameslayt-is) ad yettu ulaqrar iman-is( tutlayt-is).
Ait Slimane Hamid