Neḥḍer almi i d-tewweḍ tallit ideg amdan ur yessemgerrad gar sswab ed teɛwijt. Segmi i d-yekcem unebdu-ya deg teɣzi-s, tezga tmurt tettnezlaz, igenni yexneq, imeẓẓuɣen ttbeɛziqen, ma d allen zun sbennayent seg yifeṭṭiwjen-nni i d-ssufuɣent, isaɣuren yetterḍiqen (feux d’artifices), neɣ lbumbat n yigenni, uɣalen, lwaḥi d tḥerrayqin yettfelsiɛen, d lɛada tamaynut i d-yennulfan deg Tmurt n Yizwawen akked temnaḍin nniḍen, imi yal ttiɛad n tmeɣra ad ten-tafeḍ ɛemren ddeɛwa, ssettruyen agama ed twennaḍt, rnu sneqmisen yal amdan. D asteqsi i d-iḥettmen iman-is, amek ɛemmden yinesdabuyen (autorités) ttnuzunt tɣawsiwin-a timihanin am widak yerna ama i umecṭuḥ ama i umeqqran ? Zik d lbaruḍ kan i ssufuɣen medden bac ad beyynen tumert n tmeɣra-nsen, ma d tura d lbumbat, tiɛdawin n twennaḍt, i yewwin allaɣen n medden almi tthewwilent tawennaḍt tal taggara n ddurt, neɣ tikwal ulama tazwara-s neɣ deg tlemmast-is. Tin ɣur-s, ur neẓri anda yewweḍ akka usegmi inmetti imi idles i aɣ-d-yettwasɛerḍen ad t-nesserbu. Ɣas ma ɣlayent ayendin tbumbatin-a n yigenni, maca amdan ur d-yecliɛ deg waya ɣas ad iɛemmed i twaɣit, lebɣi-nni ed tadfi-nni mara ad iceyyaɛ urar-is deg yigenni, ugaren takkit. Da ihi i yedda ugdud deg leɣlaḍ ameqqran, ladɣa mi tettwali tuget dakken taluft-a tura teqqen i cciɛa ed zzux, yettusemma win igan tameɣra ur yesterḍeq ara tibumbatin-a am wakken zun acemma ur t-iga!
Mhenni Xalifi