Yura ɣef Si Muḥ u Mḥend, yura ɣef Yusef u Qasi. Yewwi-ten ddaw laεnaya-s isers-iten deg usqif n ṭmana akken asen-yesels tudert n lebda. Yenna Mulud Maεmmeri: “Ass-a lewqat bedlen. Yiwen ur yezmir ad yeɣḍel idles n weɣref akka kan εinani yernu s rda n imawlen-is”
Yunag ɣer ccix Muḥend u Lḥusin, yugem-d di tdmi-s laqayen aṣeḍru n tafat akken ad icerreg amendil n tatut wa ad yeffeɣ ɣer tafat, amer talsa ad tẓer d acu i d tamuɣli n uqbayli ɣer timsal icudden amden ɣer wayeḍ, acu i t-yeqqenen ɣer tudert, acu id t-yezdin ɣer yigenwan. Am wakken id as-yenna Jean Lmuhub Ɛamruc: “Lḥif yugaren lḥif, mi ara nili nella lamaεni amzun nɣab. Nettawi deg ul tumert n wid yedren, d uḥulfu n tillin-nneɣ yezdin d uḥlufu n terzeg s war tilin n yixfawen-nneɣ. Tayematt i d aɣ-yesburen laεnaya, tamurt akked wakal ara ijemεen deg yiciwi-s, d nitini i d tafeka i aɣ-iccuden ɣer ugni n war tilin naɣ. Nezmer ad d-nini ma yehwa-yaɣ yewwi-yaɣ ɣer yixef n wasmi d teflali tudert. D nitini i d aɣ-yeqnen ɣer kra akken i d aɣ-inesren si gar ifassen. S wakka yettban belli inig akked unejli llan kan d udmawen n wayen iten-yugaren acku nnig timura deg i d-nettlal, ilaq ad nefreẓ lexyal n lǧennet yeɣban. Di tilawt kra yellan di dunnit d yiwen i d udem-is !” Urar n tudert akked d lmut, werǧin jlan deg tidmi n Mulud Mammeri. Yeẓra deg tlalit te’lla tmettant deg tmattent tettili-d tlalit. Kra ur yerwil ɣef kra. Leḥmala tettarew-d lkerh, lkerh yettnawal tayri. Seg yixef n ta i yettwweḍ wul ɣer yixef n tihin. Yenna Mulud Maεmmeri: “Xas yemgared udem n lmut, lamaεni i merra udmawen-is d imessasen. Maca tella lmut yugaren yakk tiyaḍ d tamettant n yidles. Tagi d timurseḍ ur nesεi amtil imi tella-d mgal laεqel d lmaεqul. Nezmer ad as-nkellex i kra yellan s wawal yezazalen tikerkas, nezmer ad nezzuzen tudert s ubeḥri n leɣrur, maεna di leqrar tilwat ad aɣ-teṭṭef gar tuccar-is”
Mulud Mammeri, yeẓra ansi i d-tek ubeḥri n leɣrur. Mi nzan yergazen, mi iten-iɣur uṣurdi ttuɣalen d aεekkaz n lbṭal yeseqdac udabu mgal wid yettanadin ɣef tafat. Yeẓra diɣ xas ihuz yifer n useklu s waḍu n ẓur i d-iṣuḍen, ma iressa uẓar deg akal ur yelli d acu ara t-yesenquqlen. Yenna Mouloud Mammeri:
“Teqqareḍ-as wihin iccennun timuzɣa d acu i d iswi-s ? D tidett cennuɣ timuzɣa. Idles amaziɣ d ayla-w. Maca ḥader ad tettuḍ belli ula d keč i d as-d-yekren d axsim dayla-k. Tamaziɣt d yiwen udem n timadit-nneɣ, tebɣiḍ neɣ tugiḍ. Trennu azal i nekwa-nneɣ, tettega-yas ccan, tettessu zdat-as abrid n tneflit. Ɣef waya d lwajeb-iw(am wakken d lwajeb-ik ula d keč) mačči kkan ad neseḥbiber fell-as, lamaεni as-neg akk alalen s wacu ara tefti wa ad tenerni”
Iger Moulud Mammeri tamuɣli ɣer zdat. Ɣer uzekka acku yeẓra belli azekka, ibeddu seg ass-a. Ayen i ibeεden di tidet yeqrab. Ayen yellan d awezɣi ikennu zdat n lebɣi n yemdanen. D irgazen d tilawin i ibennun taɣerma, mačči d teɣerma i irefden igduden. Win yebɣan yidir yemmet, win yebɣen ad yemmet tewwi-d ad yidir; Yenna Mulud Maεmmeri: “Ticki ddant timsel mxalfa am leεwayed–nsent. Ticki di tettfent di neqma i umdan, ticki abrid deg tleḥuḍ yassawen,zmumeg-as i wugur tεeddiḍ, ɣur-k ad tereḍ aḍar! Xas kra teεniḍ yugi ad yeddu akken tebɣiḍ, ur as-ttεemid i facal ad ak-yeṭṭef afus. Xas kulci imal, yettban ẓẓay wecmumeḥ n wagaḍ ɣer yiswi ur tezriḍ melmi ad yaflali. Tudert tessewhem s sin n wudmawen-is: s rbeḥ-is akk d lexṣara-s. Qqaren d udem i iqeḍεen lewhem”
Facal yegguni amdan i wumi reqiq lḥal. Ma ɣer at rẓana d ṣṣber, ẓran belli simmal tkerres, simmal telha i tulya. Yal accudu mexdum akken ad yefsi ! Yenna Mulud Maεmmeri: Acku Ticki fad yeseḥreq deg ulawen Ticki laẓ igezzem deg yiẓerman Zun akken n rennu asɣar i tafa Ɣer tagara… Yiwen usɣar seg ufus n wakli Yezmer ad yessiɣ Deg igenni n rebbi Deg ulawen n lɣaci Times Tin ur nxetti.
Ait Slimane Hamid