Am yal lawan-a n useggas, n unebdu d yimuras, llan yimuḍan n tmaẓwalt (myopathes) n Bgayet ussan-a iɛeddan n ɣuct, deg yiwen n umsegraw ɣef rrif n yilel deg tɣiwant n Tala Xaled deg Uweqqas. D tuffɣa i uḥewwes d umerreḥ ɣer tsusmi n yiwen gar yiɣerbazen n temnaḍt-nni ideg ttnusun d ssut n lmujat n teftist, i d-yellan ɣef teɣzi n ddurt s ddaw leɛnaya n tdukkla mgal aṭṭan n tmaẓwalt n Bgayet DEFI, ɣef uqerruy-is taselwayt turmidt i ḥemmlen merra Nura Ayt Ɛebderreḥman. Rnu-as tallelt n twilayt d tkadimit n Bgayet. Deg tiɣri i uznen i wid akk i tezmer ad teɛnu taluft kra n wakud send asihar, s uxelles azamulan (symbolique) n 200 n yidinaren kan, ad sfaydin yimuḍan s uqeddic yemmden, gar lembat, aḥewwes, d tgella. Ɣef wawal n tuget yimuḍan s timmad-nsen iɣef i d-yettwahegga ttiɛad akken ad kksen ɣef wul, ma nekkes kra n yisergal imecṭaḥ, tɛedda temlilit akken iwulem s usmurres (réussite) ameqqran d tumert (lferḥ) deg wulawen. Aya imi 195 n wid i yekkin deg umerreḥ-a, ama d imuḍan i yellan deg 68, iɛeggalen, neɣ d wid i d-yusan i tallelt d ulhaw, ddukklen afus deg ufus seg wass amenzu almi msebḍan, gar ucmummeḥ, aqesser d umbaddal n tektiwin. S wakka, atan tettsemmid tdukkla-a i d-yennulfan 15 n yiseggasen ɣer deffir, deg ubrid-is n yibeddi ɣer yidis n yimuḍan, d usekcem-nsen deg tudert tinmettit n yal ass. Imi ad d-nesmekti daɣen belli ula d alemmud terra-t-id yettili-d i yimeɛḍar-is ur nezmir ad ḍefren tizrawin deg yiɣerbazen izuyaz (publics).
Mhenni Khalifi