Yiwet n tikkelt llan xemsa yiderɣalen zedɣen deg yiwet taddart. Yiwen wass yusa-d ɣur-sen yiwen seg yimezdaɣ yenna-asen : ɣurwat ha-t-an yella lfil deg taddart ass-a !
Nitni d iderɣalen ur ẓrin d acu ay d lfil. Ihi nnan-as, ɣas ur nezmir ara ad t-nwali ad neɛreḍ ad yes-s nḥulfu. Kkren ihi ṛuḥen akk s anda akken yella lfil-nni sakkin nnulen-t akk yiwen yiwen. Yeddem yiwen yenna-as :
– Hey ! Lfil am tgejdit » ay as-yenna win yennulen taɣmas-is
– Awwah ala ! am wemrar ay as-yenna win sin ay yennulen taseḍḍa-is.
– Awwah, awah, ala ! D afurek annect ila-t nṭṭejṛa » ayas-yennan win yennulen abuq-is (inzer-is).
– D tasebbaḥrut tameqqrant » ay d-yenna wis ukkuẓ (4) mi yennul ameẓẓuɣ-is
– Wa d aɣalad ameqqran » ay asen-yenna wis sḍis mi yesferfed deg uɛebbuḍ-is.
Ihi bdan la ttemjadalen, mkul yiwen yettḥettit belli d ayen yumen netta ay d tidet. Mi d-iɛedda wemɣar azemni iwala-ten ur ttemsefhamen ara dɣa yeḥbes, yesteqsa-ten : » D acu yeḍran akk-a ? » Nnan-as : » Ur nezmir ara ad nemsefham ɣef wamek ay iga Lfil ! » Sakkin kulwa yefka-d ṛṛay-is. Yeddem uɛeqli-nni yessefhem-asen s terẓen kan ed tekyest belli d tidet akk ay nnan. Yenna-asen axaṭer kulwa deg-wen yennul amur seg tfekka-is, maca s tidet Lfil ila aglamen akk ay d-tefkam imi yal aglam n wemḍiq ay yennul.
Dɣa feṛḥen imi sawlen-d akk amur seg tidet.
Ihi anamek n temɛayt-a d amur n tidet ay yellan deg wayen ara d-yini yal wa. Tikwal nezmer ad nwali tidet-a tikwal ur, acku wehhan yiswan-nneɣ ɣer tnila yemgarrden. Ihi yif ad as-nini ahat yal wa ɣer-s ifukal-is wala ifukal ur nettfuku.
Yessuɣel-itt-id Hamid Oubagha