Arraz amenzu n tasekla « Tahar Jaɛuṭ » di tedwlit-is tamenzut yettunefk i temayarut Yamilé Ghebalou-Haraoui ɣef ungal ines « Liban » am wakken i d-iṣaḥ w arazz wis ssin i umyaru « Yazid Yefṣeḥ » ɣef ungal-ines « kayen yenɣa Ɛabel »ma d arraz wis tlata yettunefk i Mass « Kefif Yazid » ɣef ungal umu isemma « temẓi yettwelqḥen ». Ungalen –agi ttwafernen, sɣur tasqamut n waktazal ɣef ayeg tella di lmendad Massa « Bou Khalou » ger 10 ungalen i d -yewḍen taddukli tussna yellan defir leqdic –agi s demma n uselway-ines Mas zayed Lefgum.
Iferdisen ɣef acu tebna tesqamut afran-ines am wakken id-aɣ-d tenna Massa Bou Khalou : d udem n tira, telqay n usentel, tuqna ɣer tira talsawit, amenuɣ ɣef tidmiwin tilsawiyin akked d tudya d tikta ɣef ayeg yennuɣ Tahar Jaɛuṭ di tudert-is amedya izerfan n umden, tilellin tmeṭut, tugdut, tudert tatrart….
Si tamma niḍden tenna Massa Bou Khalou dakken tasqamut teṭṭef ger ifassen-is azal n40 n tullisin . Tullisin-agi begnent-d leḥmala n wid iten yuran ɣer tira akked tasekla. Ayen yeṭṭfen diɣ lwelha d akken gtent tilawin yattarun u anect-a yeṣefreḥ nezzeh. Mača xas akka i d- tenna Massa Bou Khelou arrazen i tullisin-agi ur yettwanefken ara acku ɣef leḥsab-is iswir nsen-t ur yelli ara d win yullin. Anect-a yesnuɣni imyura yuznen tullisin –nsen ɣer taddukli tussna aṭas, imi ɣef akekn id aɣ d nnan ka seg-sen d lmuḥal ur telli-ara tullist yuklan xerṣum arazz n usebɣes. Kra seg-sen twehmen deg anect-a, acku nnan-d d akken tullisin uznan ɣer tasqamut-agi ttwaksent-d deg amuden i d sufɣen d idlisen yakka di tmurt n Franṣa. anact-a yeskecem-asen cekk belli tasqamut-agi testeha di leqdic-is , ur teɣri ara tullisin-nsen.
Nig waya ayen yeswehmen diɣen wid yellan assen sebt 4 Yuhnyu deg uxxam n yildes Mulud Mammeri d akken ur d telli -ara ncida n wid i yuznen leqdic-nsen akken ad ḥaḍren i tunefka « n warraz ¨Ṭahar Jaɛuṭ ». Lexṣas-ag meṛṛa yesedhec leqlil yellan din assen. Timcukal agi yakk rnan-t cekk deg ulawen n wid umu ur yehwi ara lḥal belli taddukli tussna ur tukker aḍar deg ugarrez n lecɣel. Am akke id aɣ d yenna yiwen seg wid yellan din asḥisef ɣef udem-is : « Tahar Jaɛuṭ yuklal ugar n waya. Limer d lebɣi-k a yul teẓeqa ad tereɣraɣ si lqaci akked d imalwan n tmusni ». D tagi i d tamawt wuɣur tuɣal lwelha amer imḍebren n taddukli tussna as ggen azal akka ɣer zdat , yernu diɣ ad tesduklen di temzizelt ungalen d tullisin s tmaziɣt, ayen ala ?
Ait Slimane Hamid