Ddurt-agi yezrin, taγiwant n Wizgan, i ibaεden γef teγzi n 60 kms γef usammer n lwilaya n Tizi Uzzu, tesfaydi-d s tḥeccadt , neγ « L’ambulance Médicalisée », i d-tefka Tesbeddit n umyurar agreγlan n ddabex uḍar i imucaεen deg umaḍal Zinedine Zidane. Ass n 22 γuct 2016, tella-d yiwet n temlilit meqren di tzeqqa n leqdicat n uxxam n tγiwant n Wizgan, i d-ijemεen iεeggalen n tesbeddit n Zinedine Zidane, imḍebren n wammas d tγiwant n Wizgan, tiseqquma n tudrin, timahliwin yemgaraden, tawacult n tγamsa d waṭas-nniḍen.
D tamesbanit n lxir i yesfarḥen aṭas imḍebren d yimezdaγ n temnaḍt n Wizgan, imi dayen ara-d-yeglun s lfayda meqren imir-a i yimezda&gamma,; xerṣum i umuḍin i yettidiren ugur meqqren n lexṣaṣ n ttawil n uṣiweḍ seg yixxamen γer sbiṭrat. Si tama-nnniḍen, Mass Smail Zidane, baba-s n Zinedine Zidane i yellan d aselway n Tesbeddit-agi, yemesla-d s ttawil n tilifun i ugraw yellan ḥedren di temlilit, anda i yessarem dakken lemεawna-agi d lfal n lxir, ad d-teglu s lfayda d usirem i yimezdaγ merra n Wizgan. Akken i d-iger tiγri i yimezdaγ n Wizgan ad d-dduklen afus deg ufus, ad ẓḍen tagmat d tdukli gar-asen i lebni d usnerni n tmurt. Syin Mass Saâdi Toutou, aεeggal n Tesbeddit n Zidane, yefka tisura d lekwaγeḍ i Mass Mourad Bessaha, aselway n tγiwant n Wizgan s yisem n Zinedine Zidane, u yessarem d lfal ara d-yeglun s lfayda i yimdanen merra. Imḍebren n tγiwant n Wizgan rran tajmilt meqqren i Tesbeddit n Zineddine Zidane, i mazal txeddem lxir di ddunit sumata, xeṛṣum tamurt n leqbayel imi syin i d-yefruri uẓar n Zizou. Akken i rran tajmilt i Kamel Tarwiht i yeẓḍan lexyuḍ gar Tesbeddit n Zidane d yimḍbren n tγiwant n Wizgan almi i d-tesfaydi s lerbaḥ-agi.
Islam Bessaci