Γas ma tella gar temnaḍin i yettwassnen aṭas deg Tmurt n Yizwawen, ladɣa s umazzer-is ameqqran ed ucercur n waman i d-yettawin tadfi i wallen, maca tama-ya n Kefrida aql-itt tesɛedday iɣilifen yesmeḥḥinen yal aseggas imi ur asen-d-muggen i yimezdaɣ-is akk allalen n tudert i ilaqen deg tallit-a ideg d-nesqer. Ur d ameslay ɣef tesnawit, ɣef tesreqqest (la poste), neɣ ɣef tkerrust n usellek, i yellan zun d isenfaren igeɛmura, deg wadeg anda ula d tiɣiwanin yettwaḥsaben zun sɛant azal werɛad i asent-ttwabnan tebnayin-a, maca d ameslay ɣef wayen yessefken i medden merra deg twala-ya: aẓeṭṭa (réseau) n tilifin. D wa ihi i d aɣilif amenzu tura n yiɣermanen n Kefrida. Γas ma yiwen n umahal (opérateur) – Mubilis – yewwi anezgum-nsen mi i asen-d-yerra i tsutert, wanag lɣaci n Kefrida ẓran drus-asen skud tettwanfa sɣur-sen tlelli n ufran n umahal, yettusemma at Kefrida ṭṭalaben ad sɛun ula d aẓeṭṭa n Jizi akked Uridu bac ad izmiren ad d-aɣen ticriḥin swayes ara afen iman-nsen ama seg tama n tdamsa neɣ n rraḥa n yiman. «Acḥal-aya nekkni d acettki ed tira maca ur tesɛiḍ anwa i d-yerran i tiɣri-nneɣ. Nekkni ɣur-neɣ ala yiwen n umahal i yellan deg tmurt, imi wid-nniḍen ur aɣ-d-saḥen ara». I aɣ-d-yenna yiwen n umezdaɣ n Kefrida.
Mhenni Xalifi