Iberdan ččuren d tugdi, d tugdi i yettawin srid γer lfinga, lfinga tettawi s aẓekka. Iberdan di Tmurt uqlen am lmus di temgerḍt, win icḍen ad yeglu yis, dγa leqrar-is d atnezduγt n lebda. Dγa iseflawen i tefkka ddunit deg yiberdan-nneγ ur nezmir ad asen-neg leḥsab. Mačči d leḥrir i asen-d-ssan, mačči d lebsa n ubeṛnus i asen-rran γef uεrur-nsen, meεna s yisen i γummen tifekkiwin-nsen. Akka, yal aseggas, akken i t-id-nnan waddaden, 4 igiman ttmettaten yal aseggas deg yiberdan-nneγ. Deg waya ur nufi anwa ara nesseḍlem, d acu kan amḍan-a meqqer nezzeh. D ayen i d-yura Murad Mazri deg udlis-is “Abrid n Twaγit” i deg i d-iḥekku γef yiwet n terbeεt n yilmeẓyen i iran ad fγen akkin i temnaḍt n tmurt iqbayliyen γer utaram n Lezzayer Tamanaγt anida bγan ad sgunfun cwiṭ. Seld ad ssiwḍen γer Wehran, iqubel-iten-id yiwen n lḥid i yeskukuten takerrust deg ddan. Tlata deg-sen mmuten, ma d wis Rebεa wwint γer sbiṭar anida cwiṭ cwiṭ tettuγal-it-id tezmert. Tudert γlayet. Aεli, mi d-yeffeγ si sbiṭar, tqubel-it-id tilawt taqesḥant, dγa si terẓeg d lemrar yerra-tt kan i uqlaḥ. Asirem am ifeṭṭiwej, yal taṣebḥit ad ireqq, tameddit isensay-it s lkas n lemrar. Akken yal ass, isedhuy ul-is, meεna werğin iqḍeε layas, yerna yal ass mi ara d-icreq yiṭij, ifeṭṭiwej n usirem yettuγal d target, target ad d-tecεel times n tayri, n beqqu n tudert γas akken ineẓman d wid iqeddḥen di tasa-s. Murad iddem-d tadyant-a i yerra d ungal, d tadyant i d-yekkes si tilawt. Di Tazwara ur ibγi ara ad d-yesmekti ayen iεeddan, meεna ma yella nesgugem ul i d-ittmeslayen amek ara ferzen wid i d-yettankaren? Mačči d lḥeq fell-aγ ad nessusem, ur d-neqqar ara kra γef wayen irzan timetti. Γas lğerḥ ur yeḥli, γas tasiwin ttwaqdent s beṭṭu d lfiraq, γas akken arrac ruḥen d ilmeẓyen, di telqeq-nsen, iwulem ad d-nesmekti wid yeddren d akken abrid ur ireḥḥem ara, ilaq ad nissin amek ara neddu di laman, acku ma yella neffeγ seg yixammen-nne&gamma,; ilaq ad neḥṣu d akken yemma-tne&gamma,; tameṭṭut-nne&gamma,; dderya-nneγ ttrağun deg-nneγ. Murad Mazri i aγ-d-ismektan tiyita n yiberdan, yewwi-aγ-d γer tilawt, yewwi-aγ-d γer wayen ttwalint wallen yal ass, d acu kan yewwit-id s teqbaylit i yettεuzzu aṭas, d acu kan iḥekku-d daγen γef wayen akk ttidiren imdanen di tallit-nni, d wayen akk i ten-iceγben. Murad Mazri ilul deg useggas n 1973, iḥemmel ayen akk icudden γer imesliẓri, ixdem yakan d awellaf, iḥemmel tugna, dγa s ttawil n yimeslayen isseknaγ-d tugna n tilawt taqesḥant i iqeden acḥal d tasa. Ungal-a, d ayen ara d-ifken i imeγriyen acḥal telha tlalit, meεna i rẓageḍ a lfiraq. Deg-s ad nwali d akken ddunit ur terḥim yiwen. Deg-s ad naf imektiyen d usirem n yal yiwen. Ad naf daγen timlilit n sin n yimdanen i yessawaḍen ad gen asaγ lqayen, s yis ad zdin di tdukli ara ten-yawin ad cerken lmeḥnat-nsen d wayen akk i ttεuzzun.
YAHIA YANES