Melmi kan, taddart n Timizart n Sidi Mansour i d-yezgan deg tɣiwant n Timizart deg dayra n At Wagenun ( lɛerc n At Jennad ) tella d axenduq anda iḍuman d yilefḍan ṭṭfen aḥbak i tmeddurt. Tameddurt yebran i yicuḍaḍ-is ɣef ddiq n tezrugin-ines, tacmet n leḥwari-ines . «Tidet kan , si 62 ɣer ussan-a ineggura, taddart-nneɣ tella teggursel, tezdew deg ussu n- uglugel, teqqen ɣer rrebg n ustehzi anda ḥedd ur d yecqi deg yir liḥala deg ttidiren imawlan-is. Iberdan-is nhudden, d ifermacen , ččen-ten ixemǧǧan armi asenher gar-asen yecba awezɣi. Rnu ɣef aya ammus yettnamḍaren di yal amkan, takka n ilefḍan isebɣen leḥwaṛi-s wakali. Lhaṣun mebla ma nessaɣzef awal , ur yelli i yesefraḥen neɣ i-ijbden amdan ɣer din. Xas ini d tamara iɣ-yeqnen ɣer-s wala lebɣi. » Iɣ-id yenna yiwen seg imzedaɣ n taddart-agi.
Maca s lebɣi n yal yiwen , taddart-agi tebded ɣer leqdic n yiseɣ imi ggullen ur ḥniten yimawlan-is ar tt-id sufɣen si ddel deg tteggren lesnin , lesnin yerran astehzi d dduḥ deg yemuɣred lebɣi . «Nefra-tt d ṛṛay a nezwi ammus ɣef taddart-nneɣ, a nefres deg-s ifurkawen uclixen akken ad iban wudem-is yesfan imi akken ma nella neẓra udem n taddart d netta i d-lemri n lfehma n imezdaɣ-is, d netta i d- tansa n trebga n warraw-is. Ɣef ayen-nni nekker i yiḍuman anda ma llan nekkes-asen ṛṛeḥba, sin akkin neqqim i leḥwaṛi nessa ɣef iɣeṛban-nsen tahuski , ncebbeḥ udem-is am akken tettcebbiḥ tislit imi yal yiwen deg-nneɣ yegzi d akken taddart n Timizart d netta-t i tislit-nneɣ nettɛuzzu.» Id yerna deg awal umezdaɣ nniḍen, n taddart-agi.
Anect-a yesbgned d-akken ma yella ddukklen wulawen, ma yella zdin yirgazen d tilawin n yiwen udrum neɣ taddart neɣ lɛerc ad yeknu lebɣi , awezɣi ad yer aḍaṛ am akken id yenna Matoub Lounes : « idurar ad rmimzen ». Ass-a taddart n Timizart tuɣal d taɛljet, tettfeǧǧiǧ am uzrar deg umgreḍ n tmeṭṭut. S kra n win yerzan ɣer taddart n Timizart, yessaweḍ tajmlit i kra n win id yefkan affus akken ad yessu ccbaḥa akked tezdeg ɣef yiwet n taddart id yefkan acḥal d ameɣras i lmend n tilelli n tmurt , id yefkan acḥal d ameɣnas i lmendad n tugdut menbeɛ timunent ama deg 1963 neɣ deg 1980 neɣ 2001.Am akken yeqqar wanzi s teqbaylit : “acu yettnadi uderɣal? D tafat!”
Ɣef anect-a yal yiwen yessarem ad yili warraz n tezdeg tewwi taddart n Timizart deg temzizelt –agi n 2015 d win ara yeẓẓun lebɣi deg ulawen n imezdaɣ n tudrin nniḍen n At Jennad akked tudrin n tmurt n leqbayel s-umata amer ad lalent tismin, ad mɛanadent ɣer ubrid –agi n yiseɣ akked tezdeg, ad krent tirni i yilefḍan yettcelliḥen udem n tmurt-nneɣ. Xudi tamselt yewwid fell-as uɛbaj n wawal asmi id yenna : a win yeddan d win I t-yifen/ ad yettɛanad ad a t yaweḍ!
Ait Slimane Hamid