Atan yessuqel-d umaru-amaẓrag Racid Ulebsir adlis-is igerrzen i yura s tutlayt tafransist s uzwel n «L’olivier en Kabylie, entre mythes et réalités». Yewwi-d ad d-nini belli adlis-a i umi yefka azwel tura mi d-yuɣal ɣer tezwawt «Ussan n uzemmur deg yidurar n Leqbayel», d win yesɛan azal d ageɛmir i yal yiwen ed tal yiwet, d akerraz neɣ uhu, imi yeččur d timsirin ɣef umḍal n tzemmurt, akked tektiwin ɣef tfellaḥt s umata. «D ayen yesɛan azal aṭas ɣur-i mi d-giɣ tasuqilt-a. Win yebɣan ad yeqqim d Azwaw iḥettem-it lḥal ad imuqel belli aṭas i la yettruḥun, ad yeṭṭef deg wayla-s». I aɣ-d-yenna mass Racid Ulebsir, send ad aɣ-d-yernu ɣef wazal i yesɛa udlis mara yemmeslay i medden s tutlayt-nsen. «D tidet. Asergel-nni n tefransist ilaq ad t-nekkes, ad nezger fell-as. Ula d win n teɛrabt daɣen. Akka ula d imeɣri ulac sebba ara d-naf, zun atan ur yeẓri neɣ ur yeɣri». Atan ihi ẓran yimeɣriyen belli yiwen s gar yidlisen akk ifazzen n Racid Ulebsir, yuɣal-d ɣer tutlayt tanaslit. Akken i aɣ-d-yenna, tetturaǧu tuffɣa-ines ussan-a, i win yebɣan ad yessin lesrar n uzemmur, lesrar n yimezwura, d win n tutlayt-is.
Mhenni Xalifi