Tura deg umaḍal n tsekla ed yidlisen, ur d-nettmaggar kan asnulfu n wa neɣ d wa, d tamedyezt, d tasrit, d amezgun neɣ d kra nniḍen, i d-yekkan seg tekti tudmawant. Maca ula d asenf nniḍen deg tewsit-a yuɣal yettbin-d s ṭṭaqa ɣef ṭṭwabel n tnedlisin: wa d asezgi (l’adaptation) neɣ tasuqilt (la traduction). Aṭas i nettwali taggara-ya d imyura izwawen suqulen-d idlisen n yimyura iberraniyen nniḍen, tarran-ten-id ɣer tmaziɣt neɣ ɣer tezwawt. Seg tama, llan wid ara d-yinin aya d ayen yelhan, yessebɣar tafarest (production) taseklant s tutlayt n Lmulud At Mɛemmer, rnu yettak tagnit i yimeɣri azwaw ad iɣer s tutlayt tikti n wa neɣ d wa seg umaḍal merra, war ma yerra ɣer tutlayt tawerdant i yezmer ahat ur tt-yessin, ladɣa ma d taglizit, neɣ d tutlayt nniḍen i ur nelli d tafransist neɣ d taɛrabt, imi tineggura-ya d tid i ɣran tuget n yizwawen.Maca wiyaḍ, ttwalin mačči d ayen ur nelhi, am wakken ur d ayen igerrzen daɣen tama n usnulfu. Yettusemma ma tuɣal i ufran gar usnulfu ed usuqel ulac wara d-yinin s tmuɣli tamatut d asuqel axir. Ḥaca ma yella ayen ara d-yettwasnulfun ad yesɛu aswir d ameẓyan, deg wadda, ma d ayen ara d-yettwassuqlen ad yili yuli uswir-is, ad yeɛjeb i waṭas n medden. Ihi, seg wannect-a ad nefhem belli ahat d tikci-nni, d aswir-nni amḍlan i ixussen deg wannar imi tutlayin d yiwet-nsent merra? Rnu, ɣas ad tili telḥa tutlayt-a ugar n ta, yak d ugur ara d-imager yiwen deg usnulfu ara d-yemlil deg usuqel !
Mhenni Xalifi