Yewwi-d Uḥuddu Aɣerman (Protection Civile) n waɣir n Bgayet agzul n yineɣmisen ɣef yindaren n tmes i d-yellan seg umenzu n yunyu alama d 31 deg ṭuber n useggas-a n 2015. Gar yindaren n tẓegwa ed wid n tmizar, llan-d 624 s umata, gar-asen 68 d wid iweɛren, i yerran d iɣed ugar n 497, 80 n yihikṭaren n tɣemmayt, azal n 3956 n yisekla at igumma, akked 2463 n tbaliwin n lqerḍ neɣ n walim, rnu-yas kra n teɣrasin n tzizwa. Ma yella seg tama nniḍen, ilmend n tsemhuyt yesmiḍen, ad d-yettwaheggi wahil n uḥesses sɣur Tmehla Tamatut n Uḥuddu Aɣerman, akked Tmehla n Uḥezzeb, ɣef usujed i tegrest i d-ileḥḥmen. Aya, ad yili ladɣa ɣef twuɣa merra i d-iḍerrun deg yixxamen, ladɣa ɣef ululeɣ (risque) n uxnaq i d-yettasen seg umunuksid n karbun. Ahil-a i d-yettwaheggan ad idum teɣzi n ccetwa-ya. Ad d-nesmekti dakken, akken i d-yenna Uḥuddu Aɣerman deg ulɣu-yis, aya ad yili s uttekki n Tmehla n Usegmi daɣen, bac ad ttwaḥazen ula d isɣuren iɣurbizen (établissements Scolaires) n uswir alemmas. Ma yella d iferdisen n temhelt (unités opérationnelles), yenna-d wulɣu dakken ad d-lhunt ed uḥesses n yimezdaɣ, akken ad ẓren waṭas seg-sen ɣas deg temnaḍin ibeɛden, imi aya ad yili s tallelt n umɛiwen-nsen n SDE, am Sonelgaz.
Mhenni Xalifi