Ayen yeḍṛan di Fransa ass-n lǧemɛa 13 deg Unbir-agi , Timesrifegt n tmurt n Rrus yettwaɣḍlen nnig sseḥra n Sinna di tmurt n Maṣer glant-d s lmut n izumal n yemdanen ur nednib ur nexdim kra. Ɣer wanect-a nezmer ad nadder tadyant n Lubnan akked d ibaxixen iḍeṛṛun di lberr n Tefriqt. Telsa si rrif alamma d rrif tbedd zdat lḥir-is, zdat isteqsiyen-is: acu-t yak waya? Sani i la iteddu umaḍal?
Ayen nsel yugar ayen nettwali. Yeqwa wawal , yeqwa «qiluqal», yal wa anta tamuɣli yefka i taluft. Xuḍi tuget n umeslay d tunnḍa ɣef miḥlal. D aɛiwwed n wayen id nnan yakka uqbel sɣuṛ imesjeṛnanen akked isertiyen , d isenqaden n lumur n tsertit seg asmi i-iḥuza rebrab timura n l’Europe. Awal ɣer wayeḍ ad yas win ara ak-yinin ṭṭayfa –agi n Rebrab d timnufaq texḍa ddin n l’islam, l’islam mačči akka id udem-is. Aya nesla t mačči d abrid mačči d sin. Netta di tilawt asteqsi iwulmen ad yeɣli s annar uskasi d wagi: ayen iduba n tmura tinselmin ur d tt-heggin-ara zzedmat iwulmen akken ad mḥun irabraben anda ma llan ? Ayen ur ttnaɣen-ara taskana( idéologie) tamṭṭerfit s tawil n tmussni yebnan ɣef ṣṣeḥ, s tikta yettleqqimen adif n telsa deg ixf n yemdanen ? Ayen imussnawen n wasɣan ineslem ( religion) ur tt-frasen –ara ddin-agi seg ayen yesmendigen amdan ɣer lkerrh n kra n wales i ten -ixulfen deg tmuɣli ?
Ahat aɛazzel n umussnaw am Arkoun d tiririt ɣef isteqsiyen-nneɣ. Kra n win yebɣan ad yezwi yir takka ɣef wasɣan-agi yettweɛzzel, yettaf iman-is di rrif. Ṣṣut-is yettɣummu-t zzhir n wid yesekrasen dɣel akked lkerrh ɣer tamrart n tudert. Xuḍi anda neqdent tikta yettawin imdanen ɣef tafat, ṭṭlam yettaf lebɣi-s. Tuɣalen ulawen d irebbi i ccer. Ahat iduba n tmura tinselmin d lawan tura ad ndekwin amer ad ɛiwden tamuɣli akken ad ressin deg timura-nsen iɣerbazen yettleqqimen i derya –nsen tamussni yessufuɣen ɣer tafat . Am akken ahat diɣen d lawan akken timura-agi ad ferqen ddin ɣef tsertit yerna ad ḥarfent leḥcic ddaw iḍaṛan n irebraben s- usnerni n udmawen temɛict n yegduden-nsen imi llaẓ akked nḥaf d nitni i d- ttra yettqawiten akal n tsertit tarebrabt.
Ur d teqqim ara deg umajed , neɣ deg tuzzma deg wigi ixedmen tixazabiyin-agi s wacu ttmettaten d imeyyaten n yemdanen imelsiyen( innocents) . Tagnit teɛjel tessutur tifrat s wadda neɣ m ulac akken qqaren di lemtel ad yeglu uzegzaw s uquṛan, a nemmečč ad temmečč tamurt ɣef ayeg n teddu. Ait
Slimane Hamid