La yettxemmim unabaḍ (ḥukuma) ad iɛawed tamuɣli deg tsertit-nnes n ussenqes n ssumat deg yiseggasen ay d-yetteddun yerna lemɛawna-a ad terzu kan imdanen ay tt-yeḥwaǧen ugar, ɣef wakken ay d-iwekked ass n laṛebɛa uneɣlaf n tedrimt, Abderrahmane Benkhalfa.
Mi d-yerra ɣef tuttriwin n yimaslaḍen (aɛḍa’) n Ugraw Aɣerfan Aɣelnaw ay d-yellan deg temlilit ɣef usenfar n lqanun n tedrimt n 2016, iɛawed iwekked-d uneɣlaf d akken anabaḍ ad ikemmel tasertit-nnes tanmettit (iǧtimaɛiyya), maca yessefk ad iɛawed tamuɣli yerna ad ibeddel cwiṭ, cwiṭ tasertit-a.
«D tidet nebda nettxemmim (deg unabaḍ) ɣef wamek, seg-a ɣef sin neɣ 3 n yiseggasen, ad d-nelhu s uɛawen deg ssumat», ɣef wakken ay d-yenna uneɣlaf mi d-yerra ɣef temsalt n tmerniwt n ssumat n trisiti d userɣu (waqud) deg usenfar n lqanun n tedrimt n 2016.
Deg tidet, asenfar-a n lqanun yessumer-d (iqtaraḥa) timerniwt n leɣrama n wazal yettwernan seg 7% ɣer 17% deg ssuma n ugazwal, deg lgaz agaman lemmer ad iɛeddi i 2500 n ttirmiyin i 3 n wayyuren d trisiti lemmer ad tɛeddi i 250 n yikiluwaṭen-tasaɛet i 3 n wayyuren.
«Taswiɛt-a, iɣlifen sɛan umuɣen n yimdanen ixuṣṣen mliḥ. Dɣa ad nɛeddi seg unagraw n ussenqes deg ssumat i medden akk ɣer unagraw n ussenqes deg ssumat i tegrawin ibanen. Maca ad neg aya asurif, asurif», ɣef wakken ay d-yenna Mass Benkhalfa.