Ma nerra awellih, ad d-naf dakken yella kra n umgerrad gar yiḍelli d wass-a seg tama n tmuɣli i tlufa. Kullec yelḥa ɣer sdat, ur yeqqim waddad amek akken i t-id-ǧǧan yimezwura, acu kan s lexsas.
Tidukkliwin d tid ifettin taggara-ya deg temnaḍin, s lesnaf-nsent merra, ama d tidak n yidles, addal ed tiyaḍ nniḍen merra, lameɛna s lexsas. Ur ilaq ara tidukkliwin-a ad cuddent kan i yimeqqranen, neɣ ilemẓiyen, acku mačči anagar nutni i ttalasen attekki deg tfaskiwin ed temzizzilin n wayen ssnen, bac ad t-id-ssuffɣen, meḥsub ad d-sbeyynen yes-s iman-nsen, ad d-inin belli aql-iten llan. Imeqqraren-agi akked yilemẓiyen, ɣas kra seg-sen ayen ssnen ur t-id-lemden ara seg tdukkliwin, ulama asmi llan d imecṭaḥ ahat ur nuḥent akk trebbuyyaɛ i yettakken afus n tallelt i tmernit n tmussni, wanag ufan-d tifrat i taluft-a s lebɣi i sɛan i tmazzagin (spécialités) i ten-yeɛnan, simmal ttgeɛmiren gezzun azal n tikci akked ussenfel n tiktiwin yelhan. Wamma aqcic ameẓyan i ur newwiḍ leɛmer n tnubi, ur yeḥsa ara s ubrid i yessefk ad yettbaɛ nnig tɣuri, meḥsub deg wakud n yiɣimi-s ur yufa kra iselḥen ad t-yexdem yezmer ad as-d-yernu abaɣur. Ihi wagi d anza i d-yesbeyyinen lexsas n tdukkliwin i warrac n wass-a, irgazen n yimal, tettuqqet lqella n uqeddic fell-asen. Tidukkla yessefk fell-as ad tesɛu ahil i walmend n yigerdan yal aseggas. S umedya, ulac aseḥfeḍ n wuraren iwakken ad d-ffɣen ssnen i nutni akked tmurt-nsen sey-a ɣer yimal, acimi ur d-snulfayen ara tidukkliwin n wurar n txessarin (échecs) i yimecṭaḥ-nneɣ? Acku akken iban, urar-nni d yiwen seg wuraren i d-ixellqen tigzi i umdan s umata, am umeqqran am yilemẓi, ladɣa amecṭuḥ imi akken yebɣu yili lḥal, d netta i as-yessran s waṭas, a win yufan ad d-kkren wiyaḍ ad xemmemen fell-asen.
Mhenni Xalifi