Ǧaɛfer Xalifi d mmi-s n temnaḍt n Ayt Smaɛel, d yiwen ilemẓi i yesɛan 21 n yiseggasen di leɛmer-is, d anelmad i d-ilehhun ed tɣuri-ines war ma yeggug (yebɛed) seg umaḍal n tẓuri. Deg waya ihi, Ǧeɛfer d ameɛcuq n tderbukt (dderbuka). Iḥemmel-itt aṭas, ur yettɛedday wass fell-as war ma yesderbek deg-s taswiɛt. Ula d ssut-nni i d-tettak, ɣas ma iceqqu medden i tseddart anda tikwal ixelleq-asen-d lqerḥ n uqerruy, wanag netta aya ɣur-s d anemgal, meḥsub d ddwa, acku mara ad t-yeqreḥ yixef-is, seld ad iruḥ ad yesderbek iḥellu dindin. Tannumi-ines i ɣur-s terra-t ad tt-iwali mačči kan d yiwet seg dduzan n uẓawan, lameɛna d ugar. «Nekk ɣur-i dderbuka d tamdakkelt tamekdit(fidèle), d nettat i d tamwanest-iw acku ẓriɣ-tt d tikci, yes-s i ttakkeɣ lehdu i lxaṭer», i d-yenna Ǧaɛfer Xalifi i yettafen ccbaḥa n tedfi mara yekkat iḍuḍan-is deg dderbuka. Ma d ayen yeɛnan akud n twala i ten-yezdin seg yimir-n almi d tura, yerra-d ɣef usteqsi : «S tidet ur cfiɣ melmi gedged bdiɣ kkateɣ dderbuka, skud lliɣ d amecṭuḥ, ur yelli lawan-nni deg tekwat-iw. Lḥasun ahat seg mraw iseggasen d asawen, acku acḥal-aya tura». Ǧaɛfer yessen ad yewwet dderbuka s lesnaf n uẓawan n ccna s tumata, ama d ccaɛbi, win n tmeɣriwin… D wiyaḍ. Ur yettaf tuɛert deg-sen, ur d ɛeyyu daɣen, ulama ulac amahil deg ur yelli leɛtab. Ahat d tisselbi-s i ɣur-s i t-yeǧǧan ur yettḥulfu ara s leɛtab-nni, i as-yessettsawen ɛeyyu n yiɣallen-is. Ar tura Ǧaɛfer Xalifi ur yetturar allal nniḍen n uẓawan anagar dderbuka, ɣas ma yella yettqessir cwiṭ apyanu, yestehza seg-s segmi ifaq dakken yettḥibbi dderbuka ugar. S tnaga n xilla n yimazzagen(spécialistes) n ccna, Ǧaɛfer yettgerriz mliḥ asderbek ulama leɛmer yekcem aɣerbaz n useḥfeḍ n uẓawan, rnu yettekka yakan deg kra n tmeɣriwin n ccna i yettwaxedmen iseggasen yezrin deg taddart-is. Ǧaɛfer yehwa-yas xilla umuqel deg yidrabkiyen imeqqranen, wid n umaḍal s umata, ma d win iḥemmel nnig-sen, yerra-d ɣef usteqsi yenna-k : «D Dda Rabeḥ Xelfa i yi-yerḥan ugar n wiyaḍ, s leqder-iw i nutni niḥqa, maca d netta i serseɣ deg tqacuct». Ǧaɛfer yessaram ad ifares tikci-ya-ines sey-a ɣer sdat, skud tura ilehhu d tɣuri d-yessuturen akud d aɣezzfan deg tudert n umdan, dɣa aql-it gar dderbuka d leqraya, yeṭṭef-itent di snat.
M. X.