Akken yella lḥal, werɛad i d-tekcem tegrest s sin n yiḍarren-is deg yixxamen n at yidurar, bac ad yili ugeffur d win idumen, asemmiḍ igezzmen, ed yideflawen daɣen. Maca tuget n medden ḥulfan yakan i uzaflali n ccetwa imi aql-aɣ deg-s, ɣas ma ussan n ṭṭyab iɛeddan slid talemmast n tefsut i d-smektayen. Ɣef taluft-a n umuger n ugris ed useḥmu, iban-d taggara-ya ugur d ageɛmir ɣur medden: timernit deg ssuma n umaẓuṭ ed ugaz seg umenzu n yennayer 2016. Kra n wid yellan sseqdacen ihi ttawilat n useḥmu i iteddun s yisufar-a n sseht, atnan ḥaren amek ara qablen tasemhuyt (saison) n uḥḥunǧer s teɣzi-is. Ladɣa imi, ɣef yisallen i d-yeffɣen deg tɣamsa, tezmer ad taweḍ tlitert n umaẓuṭ alama d 18.85 n yidinaren. D ayen i yeǧǧan dɣa tuget n medden zzin si tura ɣer wayen nniḍen, ɣer ttawil-nni aqbur n teqburin, ɣer uzdam ed usqucceḍ seg tẓegwa. «Ala isɣaren i nettwali ggran-d d tifrat i twaɣit-a n ussaɣli ɣas ma yewɛer rnu yeɛteb ccɣel-nsen. Ma d litra n lmaẓut ulac win ara iɛemmden ɣef lǧib-is ad tt-id-yaɣ s 19 n yidinaren ala ma i tkerrust-is». I aɣ-d-yenna yiwen n umezdaɣ n Ayt Smaɛel. Akka i ttwalin ihi lɣaci taluft si tura, ɣas ma ula d ikeccuḍen ur llin d wid yuggden deg umadaɣ am zik, am yiqejmuren yettenḍeggaren, am ttjur, uqan merra almi aṭas. Rnu ɣer-s, ɣas ahat nuḥen yimeḍqan da ed din gerrzen ayendin i uzdam, wanag tuɣal tukksa n tzedmin s uxelles !
Mhenni Xalifi