Araz amenzu n Muḥya n wewraγ di tezrigt tis snat n useggas 2015, n tira yelhan n umezgun s tutlayt n tmaziγt yuγal i yilemẓi Kamel Dahmani i tecqquft yura s usentel « Taxelwit n Cciṭan » anda is-ffkan (300 000DA). Tamesbanit-agi tadelsant tella-d γef teγzi n ssin wussan, 07 d 08 dujambar yezrin deg wexxam n yedles n Lmulud n At-Mεemmar n Tizi-Wezzu d wexxam n umezgun Kateb Yassin. D tajmilt i unaẓur Muḥya ilmend n usmekti n umuli wis 11 γef tmettant-is. Tagara n tezrigt-agi tis snat, yesdurrit-id wexxam n umezgun kateb Yassin s leḥdur n unaγlaf n yelmeẓyen d wadal mas Uld Σli Lhadi, lwali n lwilaya n Tizi-Wezzu mas Brahim Merrad, aselway n wesqamu aγerfa n ugarzu n Tizi-Wezzu, tawacult n Muḥya d twacult n tẓuri. Σumar Feṭmuc, anemhal n wexxam n umezgun n bgayet yerra tajmilt i wid yellan γef lmendad n temzizelt-agi, i ixedmen lxedma-nsen akken iwata lḥal ger-asen, Saεid Cemmax, Nurdin At-Sliman, Hassen Ḥelwan, Rabah Boucetta, Lyes Mokrab, Abdellah Arkoub d M’hana Boudinar. Dγa ma yella n uγal-d γer umzizwer n temzizelt-agi, araz amenzu n Muḥya n wewraγ yuγal i Kamel Dahmani i tceqquft-is « Taxelwit n Cciṭan », araz wis ssin n lfeṭṭa yewwit Sellami Djelloul i uḍris-is « Lanina », araz wis kraḍ yuγal i Mezghoud Nacer i tceqquft-is « Am win yettrajun tayri ». Ma yella d ssin n warazen n usebγes uγalen i Naït Sidnas Muḥand-Lεarbi i tceqquft-is « Rreḥba n imcenaf » akked Hamid Hamour i uḍris-is » yewḥec lfil rrnu-d ggma-s ». Tamesbanit-agi tekfa s tikci n warazen u ttiεad di tezrigt id-iteddun.
Tudert n Muḥya
Muḥend Uyaḥya, isem-is aḥeqqani Muḥya Σebd Llah, ilul ass amenzu n Yunbir deg useggas n 1950 deg temnaḍt n Yiεeẓẓugen, taddart-is taḥeqqanit d At Rbaḥ tamnaḍt n Yibudraren. Yelmed deg Σeẓẓugen deg uγerbaz amezwaru d ulemmas, syen yekcem γer tesnawit n Σmiruc n Tizi-Wezzu.Ass mi d-yewwi akayad n lbak, yekcem γer tesdawit n Lezzayer tamanaγt deg useggas n 1968 anda yeḍfer tusnagt, almi d 1972. Syen yunag γer tmurt n Fransa anda ikemmel ulmud-is di tesdawit n Paris VIII, dγa imir kan yekcem gar terbaεt n ugraw n tezrawin γef tmaziγt « GDB », din i yebda asuqel n tceqqufin n umezgun seg tutlayin tiberraniyin γer tutlayt n teqbaylit, gar-asent Brecht «L’exception de la règle» yerra-tt-id γer teqbaylit s usentel «lldi imi-k, ddu d uḍar-ik» deg useggas 1974, yeskels-itt-id di tezrigin «Tala», syen yerna-d tiyiḍ deg useggas n 1975, amedya «Tacbaylit» akked «Sinistri». Leqdic n Muḥya ur yeḥbis ara deg umezgun kan, yura daγen tamedyazt s waṭas, γef tsertit, timetti, tigawt…. Ddeqs n yicennayen i d-icerwen seg-s, am Yidir, Ferḥat imaziγen imula deg usefru-nni i d-yessuqel Muḥya γer Boris Vian «Le déserteur» «Amẓarṭi», Barwagya i tecna terbaεt n yideflawen, «Muḥ n muḥ» i cnant tullas n ğerğer. Tewwi-t tmettant ass n 07 dujamber 2004 di tmanaγt n tmurt n Fransa Paris, yesεa 54 n yiseggasen.
Islam Bessaci