Tuɣalin n temliliyin n tmedyezt n Bgayet

Partager

I usmekti kan, llan ttmaggant temliliyin-a kra n yiseggasen tura ɣer deffir maca yusa-d akken-nni kan wayen i asent-igan tilas almi yezri ddeqs n wakud. Dɣa, gar wid ixemmen i tuɣalin n temliliyin-a ed wazal-nsent, almi i d-teḍra teẓrigt tamenzut ass n 30 deg yennayer iɛeddan, yella umedyaz-amsuqel Buɛlam Messusi, i yellan, yuɣ lḥal, d amekfaḍu n temliliyin-a lwaḥi ed mass Kader Saǧi deg wanida i d-ttilint; deg uxxam n yidles Ṭawes Ɛemruc n Bgayet. Ma newwi-d asmekti ɣef tedwilt tamezwarut ideg llan d inebgawen yimedyawen Ǧudi Fahem akked Caybi Faysel, ad d-nini kan d tin iɛeddan deg tegnatin igerrzen akken ur ssarmen kra. «I teẓrigt-a tamenzut ur nella ara nettraǧu annect-nni d lɣaci ad aɣ-d-qublen. Aṭas n uzayez ay d-usan ad ḥeḍren i ttiɛad, ad slen i tmedyezt n yimedyazen-nneɣ. Aya d ayen yessefraḥen». S wawal-a i aɣ-d-yerra mass Buɛlam Messusi mi as-nessuter tamawt-is. Atan ihi ma kemmlent akka temliliyin-a, i yesnubguten yal ayyur sin n yimedyazen seg wid i d-yufraren yakan seg walbeɛḍ n tfaskiwin n tmedyezt tamaziɣt, ala ayen yelhan i umedyaz ed tmedyezt i s ara d-glunt deg yimal (avenir) iqerben. Deg waya, tetturaǧu ihi teẓrigt tis snat n temliliyin i wass n 27 deg wayyur-a n furar, dima deg uxxam n yidles n Bgayet. Ma d imedyazen i n-yettwanecden abrid-a d massen Xeṭṭabi Ḥmed ed Ayt Busaɛd Akli. Ilit di ttiɛad!

Mhenni Xalifi

Partager