Nnig n yimaynuten n tsekla tazwawt i d-yettaffaɣen seg teswiɛt ɣer tayeḍ, am wammuden n tullisin, n tmedyezt, akked ungalen, tella tuffɣa n yiḍebsiyen n ccna daɣen. Yiwen seg yiseɣraz-nni (albums) ihi, d win n umedyaz, mass Xalifi Mhenni, umi yefka azwel « TIFRAT », i d-yeffɣen deg duǧember 2015. Deg uḍebsi-nni ad d-naf ṭam n tezlatin i d-yettmeslayen ɣef ṭam n yisental, meḥsub yal tizlit s usentel-ines. Deg tezlit tamezwarut « Imawlan », anaẓur yerra-tt d tajmilt i lwaldin-is iɛzizen, aṭas n yimeslayen iweznen, iẓiḍanen, i d-yenna fell-asen neɣ ɣef yimawlan-is s umata. Tizlit tis snat « Tifrat n usefru », yehḍer-d umedyaz s tmuɣli-s ɣef xilla n tɣawsiwin, deg-s yettluɛa albaɛḍ ad ifiq i wayen ahat i t-yesdereɣlen, amzun yettakk-as isemtar… Tizlit tis kraḍ « Amdan igerrzen », d tajmilt nniḍen sɣur-s, maca tikkelt-a i unaẓur-nneɣ ameqqran Lwennas Meɛtub. Deg-s iwennaɛ awal fell-as s wayen akk i d-yeǧǧa leɣyab-is d lqerḥ deg wulawen, d wayen i d-yeǧǧa d timsirin mazal ad ilint, ulama yemmut. Yerna-s ccbaḥa s usirem i ilaqen ad yemɣi ɣur-neɣ. Dɣa yenna deg yiwet n tseddart « Akka i d tamurt/ i neẓra mazal ad nẓer/ ula d tazemmut/ nwan ad as-qelɛen aẓar… ». Tizlit tis ukuẓ « Taluft-nneɣ », i yecna umedyaz akked unaẓur Zeddek Lmulud, d tin i ilaq ad isel yal azwaw. Ad naf deg-s awalen n usḥissef, d uzɣan ɣef waddad n uzwaw, neɣ n tmetti s umata i iḥuzan swaswa anaẓur, ɣas ma yessekcem-d deg-s ciṭṭuḥ n usbens. Deg tezlit tis semmus « Abruy », Mhenni yesseɣzef awal deg-s ugar n tid nniḍen, imi d-yekka acḥal d tamsalt i t-iceɣben, yemmeslay-d ɣef yiɣilifen n tmurt amek zemren ad ṭṭuqten ma yella neɣfel fell-asen, deg-s yettwessi ayetma-s ɣef lasel, daɣen ad wexxren seg wanda llan send ad tettwaɣ s lekmal. Tizlit tis sḍis « Taḍsa n ddunit » i yecna umedyaz akked unaẓur n taddart-is Wali ɛebdelɣani, ad naf deg-s kra n ttuḥid d usfelsef ɣef ddunit-a ideg nettidir, seg tama nniḍen ad negzu ayen i d-yeqqar umedyaz, amzun nekni ziɣ nessenɛat-d amezgun i ddunit, s wayen akk i d-tettak… Deg tezlit tis sa « Tizlit n unelmad », yerra unaẓur ddhen-is i tecriḥt tameẓyant; i yigerdan i yellan d imal (futur). Yerna-s ccbaḥa ugar, ladɣa mi d-yessenṭeq deg-s agrud, i yellan d gma-s amecṭuḥ Meẓyan Xalifi, ad d-yemmeslay s yisem n unelmad i iḥemmlen tɣuri. Yettwessi inelmaden ad ḍefren isemtar (conseils) ɣef tmussni. Tizlit tis ṭam « Anwa i as-yennan », taneggarut deg uḍebsi « TIFRAT », win i as-yeslan ad yegzu srid dakken teččur d asirem, yal taseddart tettmeslay-d ɣef lecɣal n lɛali i yettwaxedmen, wid swayes numer imi d abaɣur kan i aɣ-d-rennun. Ayyuz i mass Mhenni Xalifi ɣef yiseɣrez-ines amenzu, afud ijehden i netta, i wid akk iqeddcen ayen yezdigen ɣef yidles.
Kaysa Xalifi