Taddart tbedd ur tmal. Tecfa ɣef ctawi qessiḥen, tecfa ɣef unebdu yeṛɣan. Di lawan-nni , werǧin yečča wamwan di tegrest, werǧin tečča tefsut di ṣṣmayem. Lmizan igerrz i wussan lkil, tisemhuyin( saisons) sɛedlent nuba gar-asen-t.
Imesdurar ggan lemqud iwussan , ferqen aseggas d iḥricen . ixf useggas yessawel lyali n yennayer, lɛezla, imirɣan, iɛaẓriyen, anekcum n tafsut, tizeggaɣin, timɣarin, lejwaṛeḥ, sswaleḥ, imeḥzan, aḥeyyan , aḥeyyan n iḥeṛṛiyen, aḥeyyan n waklan, gar uḥeyyan d nnisan, nnisan, izegzawan, iwraɣen,iquranen, adwel n tafukt, lɛinṣra, ssmayem n unebdu, ssmayem n umwan,hartadem( amedmum n tyerza), taggara n tyerza( iwejjiben),iqecqacen, tuɣalin n tafukt,iṣṣemaḍen iberkanen, lyali. Di lawan-nni akal yufa iman-is, imɣan ,ufan ttbut , iɣersiwen ufan lebɣi. Agama yella d ṣelṭan.
Tekcem tafsut war ameggar. War ma fɣent lxalat ɣer lexlawi. War ma necṛaḥent wallen n ilmeẓyen s thuzki n teqcicin ssut rubba-t akked lefwaḍi. Tafsut( sebɣen tikwal d tazeggaɣt, tikwal d taberkant) tikelt-a tuɣal d tasusamt. Tixlulin ur d fkint tafenda-nsen( parfum). Igran ur d cebḥen s iǧeǧǧigen urqimen.Agusim ur yeɣma ɣer icenfiren n teḥdayin. Tafsut n useggas-as terra aɛjar ɣef udem-is, teffer ddaw ujellab n tacmat.
Taddart tettu tamuɣli ɣer tignewt . Lebyur ur d jmiɛen aman, . Di tliwa leɛwanser qquṛen. Tisarijin n waman ččuṛent d amillus. Timiqqwa n n igeffuren uɣalent d- irragen uqbel ad nnalent lqaɛa. Xellen wussan d wiyaḍ. Ccetwa temmut uqbel ad tlal. Anebdu yessufɣ-d timejjatin-is mebɣir lawan. Tafsut tefka anzi ɣer wamwan. Amsedrar yettu lqis n tudert , iɛerq-as amek ara yelhu ilmen n tlaba yelsa.
Deg zenqen yekker uɣabar yesdelwih waḍu n fuṛaṛ yeṛɣan. Deg lexlawi knan yimɣan , lliqa tuɣal d asfer ur d nettnulfu. Deg urtan nnudment tiskar deg akken iban-asen-t id lḥal yesker. Imi ɣef yekmec wawal yesnehtit yeqqar: tasehmuyt anda akka teffer?
Ulac aman di tiregwa. Ulac aman deg iɣeẓran ..ala nnif mi yeffunzer. Amsedrar yerran regmet d lḥirfa, yir asweɛdi d ṣṣenɛa, yir lefhem d ssɛaya… yennecraḥ ul-is deg uḍumu n ilefḍan id yewwi lawan. Iɣmisen neggin d yir awal yekran gar Flen akked flen. Nessen amek ara nesfreḥ ixṣimen-nneɣ.
Deg wamwan neɣ deg tefsut aqbayli yezga yeseftutus d nnif n weqbayli. Ayen yeḍṛan deg ukabar n yidles akked tugdudt ( RCD) yefka-d ttbut amek iɛagalen-is seftin anamek n idles d win tugdut. Yecceḍ wawal di tefsut yuɣal ttwab ɣer “qil u qal”…meɛna si zik akka i yella lḥal : nessen i uɣerbal tikli, awran ad iɛeddi ma aclim yid-s a nili. Meɛna akka i yella lḥal: nessen aniwel n tarbut n ccwal bay-gar-nneɣ. Ɣef tiwwura n tefsut amek ara id ilal wawal neɣ amek ara ifakk wawal? Awal yenna-t-id bab n wawal:
Yal yiwen yenna
D nekk izewren
Kra xedmen ɛecra
A t-yexdem yiwen
Ur tḥamlem ara
Awal n tdukli
A Hmed Umeri
Iɣaben am yitri..
Ait Slimane Hamid