Ddurt-agi yezrin, tiddukla n yimaɛder d yemddukal-nsen n temnaḍt n Wizgan, s lemṣawna n tɣiwant n Wizgan akked 03 n tmahliwin yemgaraden n lwilaya n Tizi-Wezzu, ger-asent timetti, tazmert d trebga, heggant-d ssin n wussan n tusna s usentel «Asekfel n yal aṭan n laɛqel d wamek ara d-yilli uḥareb fell-as» i yebdan ass n 24 almi d 25 furar yezrin, d leqdic i yeddan ɣef teɣzi n ssin n wussan. Ahil n leqdic yebḍa ɣef ssin yaḥricen, aḥric amenzu d timlilit meqren id-yesduri wexxam n yedles Ferrat Remḍan id-yezgan di temdint n Wizgan tasebḥit n wass n 24 furar almi d tamedit n wass, anda id-meslayen 05 yimusnawen n tmurt n Fransa i ittewxeṣen deg aḥric n yimaɛder ɣef isentalen yemgaraden, gar-asen Olivier ANTOINE, yiwen umusnaw id-yemeslayen ɣef assaɣ n iselmaden deg yiɣarbazen i ittewxeṣen i yimaɛdar. Syen Leturny CATHERINE, temeslay-d ɣef usnarni d unegmu n lahdur ɣer weqcic id-illulen almi d 04 n yiseggasen. Ma yella d Debieve CATHERINE, temeslay-d ɣef uwennaɛ n tegnatin n leqraya d usekfel n wṭanen n laɛqel deg yiɣarbazen. Si tama Niḍen, mass Teiry Martinez, anemhal n yiɣarbazen n tamiwin i ittewxeṣen i yimaɛder di tmurt n Fransa, u d aɛeggal n tiddukla tagreɣlan n yimaɛder, yessaḥreṣ ɣef usejhed n lemxalṭat d leqdic ger tiddukliwin n tmurt-nnaɣ d tmurt n Fransa, i usebɣes n waḥric n yimaɛder. Ma yella d aḥric wis ssin, d timlilit id-yellan ger 05 n yimusnawen-agi n tmurt n fransa akked ixeddamen n uɣarbaz n yimaɛder (CMP) n temnaḍt n Wizgan, i ubeddel n tikta, timuɣliwin d tmusniwin i usnarni n waḥric n yimaɛder. Iswi n tmesbanit-agi d asekfel n yal aṭanen n laɛqel i yettḥazen arac imecṭaḥ, d uḥareb fell-as.
Islam Bessaci