I tikkelt niḍen, tamettant teẓẓel-d iffasen-is , tewwi mebla akukru ayen yellan d iseɣ, ḥeznent tzizwa di tefsut ɣas akken tamurt tessa s tizegzzewt d yijeǧǧigen, imi d baba-s n Tferzizwit i yemmuten, ass n 04 yebrir 2016 di taddert-is tassaft n ugemmun di laɛmer-is 94 n yiseggasen Caɛban Waḥyun (chabane Ouahioune), illul di tefsut ass n 22 yebrir aseggas n 1922 di taddert n tassaft n ugemmund taɣiwant n Yibudraren lwilaya n Tizi-Wezzu. D amyaru aqbayli s tutlayt n tefransist, id-yufraren deg annar n tsekla tagreɣlant, imi yura deqs n yedlisen ger-asen ; «La maison au bout des champs» à«L’aigle du rocher», «Tiferzizouith», d wiyaḍ niden. Caɛban Waḥyun, ger yargazen id-inejren abrid n tmusni, s tira-s, yegzem amrar n tegdi, yerz leqyud d snasel i yeqnen ameyyez, ulac ayen id-yussan seg ulac, ulac ayen yettuɣalen d ulac, kullec yettnarni, yettfukti. Dda Caɛban yenǧǧar-d abrid i yimal, issereḥ akken ad-teǧugǧgeg tmusni imi netta ger wid itt-lleqmen. akken nebɣu newwi-d awal fell-as, ur nezmir ara ad d-nezzi yakk ɣef wayen yexdem. Tamusni-s d lebḥer lqayen, d lebḥer wessiεen. Ihi tamusni n Dda Caɛban d tafat n wallaɣ, d iṭij n wass, d tiziri n yiḍ, d tilelli n wemdan. Yesakki amdan yellan yeɣfel. Tamusni ur tesεi ara tilisa, tessengugga idurar, tzegger lebḥur, tcerrig igenwan, ur tettağğa amḍiq, yal tiɣmert di ddunit tewweḍ-itt. Dda Caɛban ger wid ismendagen allaɣ-is, iẓemmi-t akken ad iniwel tamusni-s swayes yezmer ad d-icekti, ad yessufeɣ afrayen-is, syen ad yezreε tamusni-s d tẓuri-s. Amyaru Caɛban Waḥyun yettmaḍel ass n 06 yebrir 2016, di tmeqbert n taddert-is, deg akkal n lejdud-is it-id-irebban, anda iḥedren deqs n yidisan, tawacult n yedles, inaẓuren, ikabaren n tsartit, imḍebren n yaḥricen yemgaraden d waṭas n yemdanen id-yussan si temnaḍin yemgaraden.
Islam Bessaci