Iruḥ-d yiwen n ubeɛɛuc yenna-id : -Kečč-i-nni d aḥeqqar, tḥeqreḍ-iyi ass n lǧemɛa yezrin deg uɣerbaz alemmas n at Yeǧǧar, anda i t-xeddmeḍ.
Nniɣ-as : -Ass n lǧemɛa d ass n usgunfu, lliɣ deg uxxam-iw di Buzgan, tt-ferriǧeɣ addal di tiliẓri. Ma tebɣiḍ ak-d-awiɣ inigan iḥedren, taḍeggalt-iw, tameṭṭut-iw akked mmi -Teskiddibeḍ ay aselmad n tegnizit ! Kunwi s iselmaden teskiddibem aladɣa widen yesselmaden amezruy. Dɣa yeqqes-iyi yerwel, teffeg ur ẓrɣ anda iruḥ, teccuf tiṭ-iw ad as-tiniḍ d albaɛḍ iyi-wwten. -Imi kkfiɣ axeddim, ttxemmimeɣ wehmeɣ, amek-it akka ubeɛɛuc iyi-ḥeqqren sdat inelmaden-iw, yeqqes-iyi yerna yenna-id teskiddibeḍ. Ixus kan ad iyi-d-yini ur tessineḍ ara ad tt-sslemdeḍ. Cwi kan inelmaden-nni-inu maɛnen, ur ḍsin ara fell-i. Yiwet n tnelmadt tenna-id : -Aɛni d tameṭṭut-ik ik-yewwten ? Nniɣ-as : -Amer d tameṭṭut-iw iyi-wwten ad iyi-d-jemmɛem d iɣsan deg lqaɛa. Uɣaleɣ-d ar tikti-w tamezwarut, nniɣ-as : -D acu d-yeqqimen tura di tmurt-a. Zik-nni ḥeqren-iyi inemhalen, iselmaden akked inelmaden, tura arnan-d ula d ibeɛac. I ma ruḥeɣ ad inigeɣ ɣer tmurt anda ulac ibeɛɛac ? ahat ad kkfun wuguren fell-i neɣ ahat ad nnulfun imaynuten ? Amer ahat ad iyi-ḥeqqren ula d «les consulat» ad d-inin : -Ur nettak ara lviza i ubeɛuc am kečč-i-nni… Wwḍeɣ s axxam temmuqel-iyi-d tmeṭṭut-iw, as-t-iniḍ d l’extra-terestre i t-wala, tenna-id : -Anwa akka i ak-yesbezgen tiṭ-ik, Dɣa walaɣ-tt txemmel lekmam-is, nniɣ-as : -Arǧu, win iyi-tt-yesbezgen yuffeg deg yigenni, ur tezmieḍ ara ad t-qeḍɛeḍ. Yesla-d mmi yuzzel-d, dɣa yenna-as i yemma-s : -Argaz-agi yettak anzi ar baba !
Busad Ḥemar