«Awal d wawal» d wa i d azwel i yefka umedyaz aqbayli atrar i udlis-is wis sin n tmedyazt, i d-yeffɣen deg taggara n wagur n ɣuct yezrin. D ammud n yisefra ideg i d-yura 24 n yisefra s tutlayt n tmaziɣt. Deg tazwara imi d azwel ad as-yefka i usefru amenzu deg udlis-a. Tis snat imi asefru-a «Awal d wawal» uqbel ad yilli d asefru, yella-d d adiwenni ger umedyaz dda Muḥend d yiwen n umɣar deg taddart, yesteqsa-t ɣef umezruy azzayeri, yeḥka-as-d tidet n tedyanin akken ḍrant, seg rebεa uxemsin armi d tafsut taberkant (1954-2001). Dɣa yules-d ayen i d-as-id-yenna deg usefru. Ma d isental iɣef i d-yewwi awal deg wammud-a n yisefra-ines, mačči d yiwen neɣ d sin gar-asen: amezruy, tameṭṭut, lbaṭel, tirrugza, ameɣras, tuggdi, tajemilt i Mulud Mεemmri, d ugerawliw Ʃmiruc, d Lewnnas Maεtub, Lla Kahina, tutlayt n tmaziɣt, leɣrba, lḥif, taneḥyaft, taεecret taberkan n rrebrab… Muḥen n Ayt Ʃebdella d amedyaz, d ameɣras u d amaru. D amedyaz imi yebdan tira n yisefra deg yiseggasen 1974-1975, lḥaṣun azal n 40 n yiseggasen n usmedyez. D ameɣras imi yenḥaf aṭas ɣef tutlayt n tmaziɣt, afakul i d-yesbganen tayri-is i tmaziɣt, acku nettat d yiwen gar 24 n imdanen-nni iwwin ɣer deg tedyanin n 80, d ayen i d-yeskanen d akken d yiwen gar wid inuḍḥen ɣef tugdut d tmaziɣt akken ad tidir ass-a. U d amaru imi yura sin n yidlisen n tmedyazt s tmaziɣt. Ad d nesmekti imeɣriyen d akken Muḥend n Ayt Ʃebdella yessazreg-d yakan yiwen n wammud n yisefra di tefsut n 2013, d win i wumi isema «Aḍref».
ADAOUN Abdelghani.