Lydia d yiwet n tlemẓit n 17 n yiseggasen di leɛmer-is, teqqar di tesnawit di tama n M’chedallah. Yeɣli-d fell-as yiwen n waṭṭan i tt-yeǧǧan tekref deg wusu acḥal n wagguren, imi tawacult-is ɣas akken tuzzel, tnuda ur tessaweḍ ad d(taf kra n usafar ara yerran yell-is tbedd am zik-is. Ḥala rwaḥ-is ɣer tmurt n Fransa I izemren ad tt-id-yerr ɣef yiḍarren-is. Maca, anda ara taf ttawilat iwulmen i udawi-s imi ɣef leḥsab n wayen i d-ssutren seg sbiṭarat n tmurt-a n lberrani nnig n sin n yimelyaren n ssantim ara d-tesqam taluft-is. D ayen yeǧǧan iɛeggalen n tiddukla “tamgut” ad beggsen s annar iwakken ad gren tiɣri I ufus n tallelt I twacult n Lydia. Imi mebla leɛḍil, meẓẓi, meqqer, argaz, tameṭṭut rran-d I teɣri, yal wa s wacu i yezmer almi d-jemɛen nnig n wayen ilaqen n tedrimt. Ɣer taggara, ula d imḍebbren n twilayt mi walan annect n ugraw i d-ibedden gren-d afus-nsen ula d nutni. Ɣef leḥsab n yisallen i aɣ-d-yewwḍen, almi d ussan-a yezrin i d-yewweḍ usihar n rwaḥ n Lydia ɣet tmurt n Fransa iwakken ad d-kkes lhem i tt-izedɣen. Wagi d yiwen n waṭṭan iwumi qqaren “Sarcom d’Ewing” yekkaten ɣer yiɣes n taɣma, ayen ara yeǧǧen amdan ur yettadded, ur iteddu.
Nabila.B