Asufeɣ n yisental n yikayaden n BAC yeǧǧa tadwilt tamezwarut ur tesliḥ deg waṭas n yifurak-is. Wid yellan deffir n wannect-nni teddun srid ad xellsen s ubrid n usaḍuf, imi ar tura d iɛecrayen seg-sen i yettwaṭṭfen sɣur ssrabes n yijadarmiyen. Akken i d-yenna uneɣlaf amezwaru Mass Abdelmalek Sellal d tneɣlaft n ttrebga Massa Nouria Benghabrit, wid yellan d ssebba n uberreḥ n yisental, ur nwan ara kan asdebdeb n tedwilt n mayu, lameɛna daɣen d tiyita i d-wwten deg tmurt-nsen. D ayen ara aɣ-yeǧǧen ad d-nini belli tadwilt-a tis snat n 19 deg yunyu (juin), tlaq, akken ad d-ibin sseḥ seg lekdeb. «Yelha uɛiwed-a n BAC, acku d lmuḥal ad yili useɣti n yisental i yeffɣen!» I aɣ-d-yenna yiwen n umezdaɣ n Ayt Smaɛel, send ad d-yernu. «S uɛiwed-a i d-iteddun ad d-ibin s tidet win iẓewren d win ur neẓwir». Ɣef waya, ttwalin aṭas n medden dakken taɣtest (decision) n lḥukuma i uɛiwed n yikayaden d ayen igerrzen, wamma tili yeḍra lbaṭṭel d ameqqran gar yinelmaden. Afud igerrzen i wid ara yesɛeddin!
Kaïssa Khalifi