Letnayen 6 deg yunyu
d tameɣra n lisriz deg L.N Irathen nebla… lisriz. Cwi kan llan yimḍebbren n tɣiwant n Saint-Denis i d-yusan i wakken ad d-afen, akked wid n tɣiwant n tmurt, tifrat i wugur-a. Limer d taɣiwant n El Adjiba i d-qesden, tili ur d-ufin yiwen, ṭṭaxren d agraw. Ula deg ukayaḍ n BEM terwi tmaziɣt-nni ɣef wakken i aɣ-d-yura Mass Bellil. Benghebrit, daɣen, la ttnadin kra ɣef uqerruy-is , ɛlaḥsab n Smail Merzouk !
Ttlata, 7 deg yunyu
ad iɛiwed BAC-nni ass n 19 deg yunyu anda akken fɣen yisental. Ulac lɛeb ɣer Massa Benghebrit. Teẓzem-asen lebṣel s allen i wat ṭṭlam. Le CNAPEST la yettnadi fell-asen, ‘’il réclame le résultat de l’enquête. Ula d tamdint n Tichy, la tettheggay iman-is i wussan n lenḥar ɣax deg Remḍan, awi-d kan win ara iruḥen, tadrimt trebba aqacuc. Ula d Sendjak iḥemmel, ziɣ, Bgayet, ha-t-an yestenya akked MOB.
Larebɛa, 8 deg yunyu
d Remḍan, ḥwaǧen yimdanen tadrimt. 31 n lbusṭat n lwilaya n Tizi Uzzu i yellin tiwwura yellan, yakan ɣelqent, ɣef ssebba n rebrab. Llan ṭṭilin-d yixeddamen-nsent s ṭṭwiqan. Yerna, ur yettili ara lexṣas n tedrimt deg-sen, ɣef wakken i d-yenna unemhal n Algérie Poste. Ma deg Tala Bouzrou, ccukkeɣ ur ḥwaǧen ara adrim imi s uẓrou kan s wacu ttidiren. Akka i d-nnan yimezdaɣ n tama-nni.
Lexmis, 9 deg yunyu
ad yekker uhetwir deg Tizi, ladɣa deg uxxam n yidles Mulud Mɛemmri anda ara cnun waṭas n yifennanen, yecban, Ali Amrane, Malika Domrane, Yasmina, Nouara, Kheluoi, Guebas d wiyaḍ. Waqila deg Tubiret, ur ttxillisen ara trisiti. 441 d amelyun idinaren i yellan d ṭṭlaba ɣer yimezdaɣ. Yerna zemren ad d-rnun, ad d-reḍlen 30 000 n yidinaren ma bɣan i wakken ad skecmen lgaz. Ula d tacennayt Yasmina, teḥwaǧ waqila idrimen. Sin n Albumat ara d-tettheggi i wussan-a. Akka i aɣ-d-tenna mi d-terza ɣer uxxam n uɣmis ‘’La dépêche de Kabylie’’.
H.Moula