Ttɛeddin yiseggasen, ttemgaraden, yal wa s wacu i d-yegla d aɛwin. Remḍan n useggas yezrin, ahat ma ad qerrin yimdanen, ad yeqqim d aktay deg wallaɣen imi azzayri yuɣ isufar n wučči s ssuma iwumi yezmer. Di tallit-nni, taɣlift n tjara tbedd akken iwulem deg unnar iwakken ad tɛass isemṣaren-nni I iwulfen ssalayen, srusuyen di ssuma akken I bɣan. Terra zzerb I tḥila d tukerḍa iwakken ssuzef lḥif yettmagar umdan yal mi ara d-yejdu waggur n Remḍan. Mačči kan d asexdem n yisuḍaf iɣer terra lwelha-s taɣlift-a n tjara, maca teldi leswaq deg waṭas n temdinin anda azzayri ad d-yaɣ ayen yebɣa, s ssuma yettwaqbalen yerna deg tezdeg. Aṭas, di lawan-nni I yuḥmaden meɛna mebla ma bedren-d wid d tid yellan deffir n uxeddim-a. Aseggas-a, yeqqel uqelmun s iḍarren, nuɣal am zik-nni, yegguma uḍar ad yeddu ɣer ssuq, imi yeqqel yesserhab ! Amek ur yettebbluhmut ara umdan imi yiwen n wass kan uqbel aggur-a n “rreḥma” ddellaɛ yellan s 40 n yidinaren yesrafeg ɣer 130 DA deg yiwen n yiḍ ? Mačči ḥala asafar-a I tḥuza tmerna, maca akken llan yisufar ttwaḥuzan. Lbaṭaṭa-nni yellan tettnuz deg yiberdan, di kra n yimuan ssawaḍen-tt-id alamma d tiwwura n yixxamen, tuɣal irkeb-itt lḥir ula d nettat tennerna deg wazal s tlata n yiḥricen. Tuget n yisufar zaden seg tlata ar rebɛa n yiḥricen mebla ma tella-d akka kra n lɛessa neɣ asendeh seg tama terza taluft n tiɣin d usenzi. Lḥasun teksa mebla ameksa ! Yal wa ad yexdem akken yebɣa, ulac win I yerkeb lḥir ɣef liḥala yettidir uxeddam, ur neẓri anida ara tt-iger I yixef-is. Ayen yessewhamen ugar, dakken ttaɣen madden mebla cceḥḥa, ad twahmeḍ tikwal anisi I asen-d-tekken yidrimen. Deg yilsawen, yezga wawal: “yella Rebbi ad d-yefk sɣur-s”. D asiksel ɣer yiḍellaɛen, amzun akken terkeb-iten tawla n tiɣin. Ddan almi I ttnaɣen ula ɣef lebsel d zrudiyya, yal wa yeqqar d nekk I d-yezwaren. Ɣas ulamma yella-d waya, ass amenzu n Remḍan, leswaq imerra ɛemren d lɣaci, ayen yeǧǧan imetjaren ceɛlen times deg swami yerna ur yesɛi umdan azref ad yefren as afar ara yawi: aɣ neɣ qim ! Amzu akken imdanen yeṭṭef-iten-id Rebbi ɣer yifassen n yimessenza-a, ad ɣmen igelman-nsen. Ur d-telli lɛassa ɣef swami, ur llin leswaq n tamiwin neɣ «les marchés de proximité», yal wa iteddu akken yebɣa. D acu kan, akken ias-yeqqar umedyaz-nni: “ɣas nettaɣ-itent, negguma ad necfu”. Akka, iles ɣezzif ɣer win yettilin ɣur-neɣ, gar-aneɣ, yetteḥbibir ɣef tudert-nneɣ. Wamma, win I aɣ-yeǧǧan deg yimi n tlafsa ur aɣ-yecqi ad nemmeslay fell-as, nefka-as lehna d talwit, ad yesserwet akken yebɣa.
Smail. M