Xilla n medden i iḥemmlen tiliẓri, zgan neṭḍen ɣer lemri-ines, ṭṭafaren ayen i d-yettɛeddayen deg-s. Seg tedwilin, ccna, iɣmisen, llan daɣen yisura. Iban dakken win, neɣ tin i yettferriǧen i yisura-nni, ad naf seg-sen kra n wid i ten-yesmenyifen ad asen-isel s tutlayt-is netta, mačči s tmeslayt-nniḍen. Ma neddem-d amedya, ad nefren atmaten izwawen. Segmi i asen-d-tusa tegnit ad ttwalin ayen i ten-icudden, gran ɣur-s s tumert, ttabaɛen-t s zzux. Acu kan ɣas ma yella d tidet nelḥa asurif ɣer sdat, ur neqqim deg yiwen n wadeg, maca mazal nẓer lexsas deg yiḥricen. Am yisura i d-yettaffaɣen di yal taswiɛt, win i yesɛan tirmit deg umaḍal n tmuɣli d tamawt, ad d-yini dakken aqeddic n wid akk i yettekkayen deg lebni n usaru, mačči d ummid i yella, ur igerrez ara. «Deg yisura n teḍsa, ttwaliɣ aswir yelha, ileḥḥu ɣer sdat. Am Luhama 5, tehwa-yi aṭas. Ma d isura-nniḍen, ulac, kerheɣ akk ad ten-ẓreɣ. Ilaq ad yili ufran n wid i ara d-yuraren, yerna ad ilin d wid i d-iɛeddan seg umezgun». I d-yenna yiwen n gma-tneɣ seg Tubiret. Ur nettaf ara ula d amaynut deg yisura-nneɣ, qrib dima ttarun yiwen n usinaryu d teqsiḍt, izeffanen(comédiens), daɣen, ur ssinen ad steɛemlen akken iwata, ad d-banen s wudem n tsemdanit tis snat i asen-yettunefken deg usaru. Asufeɣ tikwal ur t-nettaf ara yelha deg yal taɣawsa, ladɣa deg usiweḍ n ssut d ssfa n tugniwin. Mačči d ugur, neɣ d sin i d-nettmaggar deg yisura n teqbaylit. Acimi ur d-ttnulfayen ara yiɣerbazen n useḥfeḍ n tmellaɣt(comédie), akken ad tt-sseɣren yimazzagen d Wat tirmit? Ayɣer ur yettmagga ufran i wid i yuklalen ad ilin deg usaru? Iwacu ur xeddmen ara ajerreb s yikayaden n BAC mačči d menwala ara yeṭṭfen ayen i t-yexḍan? … D isteqsiyen qqimen ddewwiren, ɛellqen deg yiqerruyen n wid i yebɣan ad neddu ɣer sdat, ad nessali aswir-nneɣ am tmura-nniḍen i yewwḍen taqacuct, neɣ tid i ileḥḥun ɣer wannect-nni. Niḥqa d awezɣi ad yelḥeq yiwen iswi-ines iɣef yettnadi, ḥala s leqdic s leḥsabat, war ma nettu leɛtab daɣen. Yal aɣbel yesɛa tifrat, ihi ilaq ad nefsi leqyud, ad nfiq i wayen i aɣ-imenɛen ad nezger iɛewwiqen-nneɣ. Nessaram ad nwali areqqaɛ deg yisura n tezwawt, ad ttwaseggment tuccḍiwin deg yal tama. Ad yelhu ccɣel mi ara yekfu, akken ad aɣ-yehwu. Nessaram mi ara nettmuqul taqsiḍt ad tt-nedder, ɣas ulamma d asnulfu kan, ad nḥulfu yis-s d tidet, ad nesfaydi seg-s daɣen.
Kaïssa Khalifi