Terna sselɛa mačči d izli !

Partager

Leɣla n kra n yisafaren n tuččit akked yisenfan n sselɛa yemgaraden, yeqqel d taluft, d ugur ɣur yimdanen. Ladɣa igellilen ur neksib aṭas n tedrimt. Ma nuɣal cwiṭ ɣer deffir, neɣ ɣer yiseggasen yezrin, ad naf dakken ssumat n kra seg wayen yettnuzun am yiselman d wayen-nniḍen, simmal rennunt tteɛlayent ugar. Imi azal n wa neɣ n ta ur yettɣimay amek yella, yeswa send ad izid. Гas ma imsaɣen nnumen taggara-a abeddel n ssumat i d-igellun s leɣla-nni, maca simmal ttqabalen-t qebblen-t, simmal ttwalin iman-nsen deg temḍerrit ur nettseɛɛid addad n texriḍt. Dɣa, iban belli annect-a, ur yehwi i uɣref i ilan lexsas n ttawilat swayes ara yesseɣleb ɣef uɣilif, ad yezmer ad yerr abeddel i d-yellan d wicqa kan. ‘’Amek ara yizmer yiwen i teɣlayt-a i d-yettilin, ma ahat tamayyurt-is ur as-tettqiddi i wayen akk ilezmen!?’’, i d-yenna yiwen n urgaz. Nnig ssuma n lgaz i yernan deg wayyuren iɛeddan, tzad ussan-a, ssuma n tmellalin. Amedya : deg Ayt Smaɛel d temnaḍin i as-iqerben, tneggez ssuma n yiwet n tmellalt seg 12 n yidinaren alami d 15 ma terxes zun. Acku llant tḥuna ideg ttnuzunt, ttawḍent 20 n yidinaren. Aya yesbeyyin-d dakken tettiɣlay temɛict, tettiwɛir, ur d rrxa i d-yettawi wakud i umsuder. Rnu ɣef waya, yekker wawal ussan-a ɣef leɣla ara yilin di tazwara n useggas-a amaynut i d-iteddun. D ayen i yeǧǧan aṭas n lɣaci ran ad xedmen tadamsa i leǧyub-nsen. Ruḥen, uɣen-d kra n sselɛa i izemren ad tt-sersen, ad tt-xeznen. Am lmaẓuṭ i d-yeddan s tbettiyin seg tura, send 2017 i d-yettaẓen. Leɣla-agi ihi, iban ur t-bɣin xilla n yimdanen, imi llan wid i yessiwilen i usunded.

Kaïsa Khalifi

Partager