Akka tura, yella kra n lxuf deg wulawen n medden ɣef wayen tetten i yiɛebbaḍ-nsen. Seg taluft n yiyuẓaḍ yettnuzun iɣef mazal yekker uberraḥ ar tura, dakken llan wid i d-yettrusun di ssuq ur sliḥen i tuččit. Ladɣa segmi d-banent kra n tvidyutin deg Internet ideg nezmer ad nwali amek ttwasuḍayen yiyuẓaḍ s tmacinin. Yal mi ara sɛeddin tissegnit ɣef uyaẓiḍ ad icuf dindin, ad yernu deg temɣer d lmizan. Annect-nni dɣa, yeǧǧa aṭas n twaculin ad ḥebsent tiɣin n uyaẓiḍ iheggan neɣ iruṭin, ala ma yedder. Ha-t-an tura ihi, tezzi-d taluft ɣer yisafaren-nniḍen iɣef i d-qqaren xesren i tgella, am rruẓ, aksum akked lqahwa. Isafaren-a dɣa, ttekcamen-d abeɛda seg Ccinwa deg Tesga. Ɣef leḥsab n Tdukkla taɣelnawt n yimsenza, ad yili rennun i lqahwa zzayed yettḍurrun, i izemren ad yili deffir waṭas n waṭṭanen, am uxenẓir (cancer) akked tezɣint n wallaɣ neɣ ayen iwumi qqaren AVC. Seg tama tayeḍ, ɣef wakken i d-wwin kra n yidigan n Internet, ad yili usafar-a i d-yettekcamen seg tmurt n Ccinwa, yesɛa ssker ixesren. Ugur ameqqran i d-ibanen deg mi d-nnan wid i teɛna taluft n tɛessast d uḥuddu, dakken yewɛer ad teẓreḍ d anta sselɛa i ixesren d anta uhu seg tid i d-yettrasen deg usagen. D ayen i yellan d aɣilif ameqqran. ihi ma ttaɣen-d medden aṭṭan-nsen nutni ur ẓrin!
Mhenni Khalifi