Ddeqs n leqdicat i d-ittwheggan γef demma n waggur n remḍan di yal timnaḍin yemgaraden n tmurt n Lezzayer, am d timesbaniyin icudden γer yidles, addal, timetti, lumur n ddin d waṭasn-niḍen. Dγa tamnaḍt n Wizgan tella di ttiεad, imi tiddukla tadelsant Tiεwinin n taddart n At-Wizgan, thegga-d tazrigt tis 03 n temliliyin n umezgun i yebdan ass n 23 yunyu almi d amenzu n yulyu i d-iteddun, d leqdic ara yeddun γef teγzi n 09 n wussan. Leqdic-agi, yella-d s lemεawna n tesqamut n taddart n Wizgan, taγiwant n Wizgan, tinmahliwin n yidles akked yilmeẓyen d waddal n lwilaya n Tizi-Uzzu, aseqqamu aγerfan n ugarzu n Tizi-Uzzu akked d uxxam n umezgun Kateb Yacine. Ahil n leqdic d amesbaγur, anda yella usenεet n umezgun s yisental yemgaraden, cnawi, tamedyazt, cḍaḥ aγerfan d waṭas-nniḍen. Tadwilt n useggas-a, tennarna s waṭas u temgarad aṭas γef tin yezrin, imi nnig n 12 n trebuεa n umezgun ara d-yassen si 04 tγemmar n tmurt n Lzzayer ger-asent : lwilayat n tmurt am Tizi-Uzzu, Tubiret, Bgayet , Batna d Wehran. Akken yella umaynut di tezrigt n useggas-a, imi yal tarbeεt ad senεet taceqquft-is i tikkelt tamenzut s usentel amaynut. Gar trebuεa-agi n umezgun d isental yellan, tarbeεt Macahu (Taḍsa di twaγit), tarbeεt tafat n Imsuḥal (Ccḍaḥ aγerfan), tarbeεt lemri n Leqṣar (Agerruj yefren), Djurdjura n Saharidj (Sidi Hlal), tarbeεt n umezgun n Wad Amizur (Ğeḥḥa), tarbeεt n umezgun asirem n Lewres n Batna (Nekk akked Jack), tarbeεt n umezgun n Tewririn n At-Yiraten (Muḥend Ucaεban), tarbeεt n umezgun Asirem n Wehran (Tirga n Cibuḥ), tarbeεt n umezgun Ifeḥcac n Ğerğer (Selṭan). Akken ijerden deg wahil-nsen n useggas-a, asenεet n usaru ixedmen s usentel Timektiwin n Taddart, anda imγaren n taddart n Wizgan, ffkan-d tinigiyin-nsen d cfawat sεeddan. Iswi n temliliyin-agi, d aseqreb n umezgun γer tudrin n leqbayel d usebγes n yilmeẓyen akken ad kecmen s tehri annar-agi n umezgun i yellan d ababat n tẓuri i usnerni n yidles amaziγ. Akken tella ,daγen, d tagnit yelhan i twaculin ad farsent uḍan n remḍan ideg ara temlil tassa d way turew, d uẓeṭṭa n tegmat d tdukli gar yimdanen.
Islam Bessaci