Acḥal-aya tura, nekni nettmeslay ɣef uɣilif n waman deg tɣiwant n Ayt Smaɛel, i d-yezgan s wazal n 60 n yikilumiṭren ɣer unẓul-asamar n waɣir n Bgayet.
Imezdaɣ n temnaḍt-a, ccetkayen, ladɣa ɣef wakud awezlan i asen-d-yettsiḥen mi ara asen-d-ttwarren waman, ass ɣef wass. Yernu, ula deg wayyur-a n remḍan ideg nella. Seg tama n tɣiwant, ɛerḍen buhan n tikkal yimḍebbren-is ad farsen tiɣbula (sources) n waman i yellan deg Udrar n Fad. Ad tent-id-jebden, wissen ahat ad qqiden tasutert n waman n yiɣermanen n tɣiwant i iɛeddan 15 000 d aterras. Am tigawt i mazal tettmagga ar tura deg leɛnaser ideg llan waman, maca yewɛer ayendin usiweḍ-nsen. Yelha ma nesmekta-d belli taɣiwant n Ayt Smaɛel tesruḥ, deg wayen iɛeddan deg umḍiq-nni, qrib d imelyaren yerna ur tessaweḍ ad d-tawi aman. Tal tikkelt, yettili-d wayen i d-iḍerrun d aɛewwiq : ma ur d lberḍa d atterḍeq n kra, ma ur d atterḍeq d taɣelyawt neɣ d taruẓi n kra nniḍen, ma ur d taɣelyawt d aḥbas n termist (entreprise) i yeṭṭfen asenfar. War ma nemmeslay ɣef wuguren i tuɣ ttwaxlaqan-d sɣur lɣaci n tama-nni. Aredmani, aṭas i yettwalin belli iɛewwiqen akk i d-yettnulfayen seg wacḥal d aseggas, kkan-d seg ‘’Sellaḥ’’ n temnaḍt-nni i ahat ugin ayen yettmaggan. Lameɛna, ass-a n wussan, ugar n usenfar-a n ujbad n waman seg Leɛnaser i kra n tuddar deg tɣiwant, yella wayeḍ d ameqqran ttraǧun-t merra. Wa d asenfar n ujbad n waman seg Lɛenser Azegza. Ɣef leḥsab n teɣbalut-nneɣ deg tɣiwant, d ayen ara yekksen aṭas n yiɣeblan i yimezdaɣ mi ara yettwaxdem. Neẓra temmug-as dayen tezrawt n d ayla-s, maca kra n tlufa, ladɣa tid icudden i ureqqaɛ n yikaɣḍen, akken ad bdun wid i yeɛna ccɣel deg usbedd-ines yiwet, yiwet. Ass-nni, ahat, ad yefru dayen uɣilif n waman deg Ayt Smaɛel!
Mhenni Khalifi