Yeffeɣ-d ussan iɛeddan wammud n tullisin s uzwel « Nna Geltum », ɣer teẓrigin Tira. Ammud-a i yura mass Mhenni Xalifi, d win i yettawin sḍis n tullisin: Nna Geltum, Tafrara tamenzut, Tiṭ n usirem, Tuɣalin, Tawenza akked Imejɛuren n wakal. Ad tent-naf yal yiwet s ccbaḥa i tekseb d usentel iɣef i tt-yura umaru.
Tullist tamezwarut « Nna Geltum », tḥekku-d ɣef wudem n yiwet n temɣart umu yerra umeskar tajmilt. Nezmer ad naf deg-s iḥulfan, asekfel n kra n wansayen n yizwawen d umeslay daɣen ɣef wayen i yerzan taɣara n tudert deg yiwet tallit. « Tafrara tamenzut », ad d-yemlil deg-s yimeɣri akked yiwen n usentel d amaynut n tfelsafit ideg i d-yettwasbedd umdan d wamek i d-yufa iman-is deg ddunit, lwaḥi d tudert i yebnan argaz d tmeṭṭut.
Dɣa kra win ara tt-yeɣren, ad yettak i yiman-is isteqsiyen ɣef kra n tlufa wiss ad d-yesɛu tiririyin i yettnadi. « Tiṭ n usirem », d udem nniḍen swayes ahat yeɛreḍ umeskar ad yesseqdec kra n timmeɣnest d umennuɣ ɣef tmagit. Imi deg-s ad d-nemmekti xersum kra n yisatalen (contexts) n umezruy n yimaziɣen d wamek ḍerrunt deg kra n tlufa seg zzman aqbur. « Tuɣalin », d ssenf nniḍen n tullisin i iḥemmel yiwen ad iɣer, ladɣa imi tebna s yiwen n uɣanib n yiḥulfan akked tmelsa (innocence). Imi seg tazwara-ines ɣer taggara-s, yella deg-s wayen i yettaǧǧan yiwen yeɣɣar war ma itekkes-d allen-is, ladɣa imi tigzi d tin isehlen almi d iswi aneggaru. Ur temgerrad tullist « Tawenza » ɣef tiyaḍ seg tama n tezmert n usentel, ɣas ma yella yal yiwet s wayla-s. Lameɛna tessenɛat-d kra n teqsiḍin n umezruy i ur nebɛid, d tuɛert n kra n tɣawsiwin ɣef twacult.
Ma d tullist taneggarut “Imejɛuren n wakal, ad nɣer deg-s amek yezla umdan i yimenzayen n tudert, isebbel talsawit d tegmat ɣef yisergal n uɛuffu d tismin. Yuɣ lḥal ammud-agi « Nna Geltum », d adlis wis kraḍ i d-yesseẓreg umaru-amedyaz Mhenni Xalifi. Niqal yessufeɣ-d yakan deg usseggas n 2014 ammud n tmedyezt umi yefka azwel « Nnehda n uḥulfu ». Yerna yessufeɣ-d deg yiwen n useggas ungal umi isemma « Asdawan ». Ɣas yesɛa umaru tirmit deg umaḍal n tira d wawal ijerrden, yettraǧu kan s ccuq tamuɣli n yimeɣri i usenqeḍ. Nessaram-as afud igerrzen!
Kaysa Khalifi