Ussan yezrin, 7 deg wayyur n yulyu, i d-uɣalen yigemmad ineggura n umsizwer n yiselmaden deg waṭas n taggayin (catégories). Deg wayen yeɛnan anadi ɣef yimeḍqan n uselmed sɣur wid yesɛan turagt deg tutlayt d yidles amaziɣ, imi yimɣur azuḥ wazal n tmaziɣt deg tmurt. Ddeqs n yilmeẓyen iwumi d-yezmummeg lḥal tikkelt-a, ttwaqeblen dayen i uselmed n tutlayt n Lmulud At Mɛemmer seg tuɣalin tiɣurbizin i d-iteddun deg ctember, i lmend n useggas amaynut 2016/2017. Ɣas llan wid i wumi i d-tsaḥ tegnit ad sseɣren nutni ur sɛin aseggas segmi i d-wwin turagt, llan wiyaḍ d iseggasen ttraǧun taswiɛt-a, nutni war axeddim. War ma nettu wid ur d-nedda akk tikkelt-a deg wid irebḥen. Seg wid i d-teṭṭef dɣa tegnit n tumert ussan-a yezrin, nesteqsa kra, fkan-aɣ-d tinagiyin-nsen. Am tin n Ḥsen seg Tizi. «Ferheɣ aṭas seg ugemmuḍ. Ulama llan diɣen wid yuklalen ad d-awin amsizwer ur t-id-wwin, maca mazal asirem ɣer sdat. Ayen yeɛnan amsizwer di tmaziɣt iɛedda di teswiɛin igerrzen, ama d tira neɣ d adiwenni».
Ma yella d Nawal seg Bgayet, tban-d am tin i d-yessufɣen «ukit», ladɣa mi d-iban umsizwer n useggas-a yexḍa i urbaḥ-nni n seddaw ufus, mi d-tenna: «Akken walaɣ, ikayaden d yisteqsiyen sehlen i yal aselmad. Seld leɛtab meqqren d miḥyaf i d-yellan di teɣzi n waṭas n yiseggasen, deg temsizzelt-a, ladɣa di temnaḍt n Bgayet, umreɣ imi d-yelḥeq wass nwala iselmaden wwin-d imukan n uselmed war tijeɛɛal, war timusniwin yeffɣen annar n tmussni n wannar. Ma d asirem-iw, nessaram ayen i nelmed deg tesdawit, ladɣa sin n yiseggasen n Master di taɣult n tusnalmudt n tutlayin, ur yettruḥ ara di rrayeḥ. Nessaram ad nesnerni aselmed n tutlayt-nneɣ, ad tt-ḥemmlen yinelmaden ad tt-lemmden akken iwata».
Afud igerrzen ihi i wid i t-id-iḥellan, ttiɛad deg ctember i beddu n termit tameqqrant deg wannar-a n usker n tsutiwin.
Mhenni Khalifi