Asekfel n umezruy n Lezzayer d win yettnarnin yal ass, imi ussan-agi yezrin amjahed Si Mohand Said Akli, mmi-s n Kulunel Muḥend Welḥağ, imḍebbar anegaru n lwilaya tis 03 tamazrayt, yesuffeγ-d adlis wis 02 n umezruy, s usentel » La Glorieuse Révolution Algérienne », i d-iyefγen di tezrigin Sarah deg umenzu n wagur n yulyu 2016. Adlis-agi yebḍa-t γef 34 n yaḥricen, anda id-imeslay s telqay γef deqs n temsal d tlufa, ad-nebder ger-asent aswir n Ṣummam, tamesbanit n Jumel, tinigiyin n Kulunel Muḥend Welḥağ, tudsa n lbaḍna di tallit n tegrewla, tibezrin d waṭas niḍen. Akken id-yuγal γef lewfaq n EVIAN, lejrima i xedmen lεeskkar n tmurt n Fransa deg tama n Yiflise, tamesbanit n 11 d ujambar 1960 di Lezzayer tamanaγt, amecwaṛ n umyaru di tallit n tegrewla d waṭas niḍen. Adlis-agi yesεa 208 n yisebtar, yettnuzu s 450 n yidinaren, u yella di deqs n temkarḍiyin.
Awal γef umyaru
Akli Mohand Said d mmi-s n Kulunel Muḥend Welḥağ, ilul ass n 19 yunyu 1933 di taddert n Wizgan (Bouzeguène) lwilaya n Tizi-Wezzu. Yelmed deg uγarbaz amezwaru n tlata seg At-yexlef, syen irruḥ γer Lezzayer tamanaγt akken ad-ikemmel ulmud-is deg uγarbaz alemmas n Vieux Kouba. Yunnag γer tmurt n Fransa deg seggas n 1952 anda i yebda ixeddem deg luzin n Coder Saint Marcel. Ass n 12 maggu 1954 yekcem ad-yesεeddi lεeskkar, Amenzu maggu 1956 yeffeγ-d di lεesker, imiren kan yuli s adrar, anda baba-s yummer-it ad-yekcem γer tarbeεt n Iken Mohand Said i yetwasnen s yisem n tegrewla « Σemmi Muḥ ». Iεedda d aγella u d imḍebbar di deqs n temnaḍin n lwilaya n Tizi-Wezzu.
Mbaεd yiwet n txazabit meqren id-yeḍran di taddert n Wizgan ass n 05 γuct 1960, yetwajraḥ deg uqarru akked ufus-is, yettwaḥbes di lḥebs n Tizi-Wezzu anda is-saṛwan lemraṛ d laεtab,syen sarḥen-as-d aseggas n 1962 timmunent n tmurt n Lezzayer. Mbaεd 53 n yiseggasen, yesuffeγ-d ismektayen-is, imi yuγ lḥal deg seggas n 2011 yesuffeγ-d adlis-is amenzu s usentel » Si Muḥend Saεid Iḥekku-d Amγar » id-yefγen di tezrigin n tira, tura yerna-d adlis-is wis ssin γef tegrewla Tazzayrit 54/62.
islam Bessaci