Melmi ara tagad tmeṭṭut? Ɣas yuzzel wawal taggara-a ɣef ucelleqluq n waskiw (kyste ovarien) gar tulawin, d timexḍa tid yessawḍen ad fehment tidet-ines; i mi mačči texṛeb tarda(les règles) neɣ ad d-teddukkel d uqṛaḥ ad tt-tcudd tmeṭṭut ɣer waṭṭan-a. U mačči mi tfaq tesɛa-t ad testehzi deg-s neɣ ad tt-yarez uɣilif fell-as. Ɣef waya nebɣa ad d-nefekk kra n tmusniwin ɣef waṭṭan-a. Asegzi n ucelleqluq n waskiw . D talɣa tamaynut icuban taculliḍt yeččuṛen d aman. Tezmer ad d-tlal daxel n waskiw neɣ beṛṛa-s. Sumata, yettili kan deg yiwet n tama. Tignatin ideg i d-yettban waṭṭan-a . Ccirat yezgan ɣer tlawin am : aqṛaḥ ameqqṛan s ddaw n tɛebbuḍt, ladɣa di tallit n tarda; anexṛub n tarda ara d-yettasen war ttiɛad, tikkwal ma meqqeṛ ucelleqluq yezzmer ad d-iban s usebren n waskiw. Iseggasen-a ineggura, tussna tbeggen-d d akken aṭṭan-a, yezmer ad yili d sebba n uɛeṭṭel n dderya. Tikkwal yezmer ad yili d asusam, war ma banent-d ccirat-a, meɛna s l’echographie n usefqed ad d-iḍḥu. Acu n tewsatin n ucelleqluq i yellan ? S ttawil n l’écographie, amejjay yezmer ad yegg amgarad s lebyan gar snat n tewsatin n ucelleqluq n waskiw : acelleqluq icudden s anerni n tmellalt i d-yettlalen seg waskiw yal ayyur, imi ma ur tessaweḍ ara ad d-teffeɣ seg-s, tettuɣal d acelleqluq deg waskiw, d tawsit-a i yeṭṭuqten aṭas (25% n tilemẓẓiyin), sumata kṛaḍ n wagguren ar sdat, ad iɣab war ma yewwi-d kra n wugur neɣ n tugdi. Yella daɣen ucelleqluq agmaman (kyste organique), ur yeṭṭuqqet ara am umenzu (5% n tilawin), yettlal daxel n waskiw gar tesririn-is(cellules), yesɛa tazmert meqqṛen, ad yeqqel d lkunṣir s teɣzi n wakud, d win ur nettruḥu ara seld kṛad n wayyuren. Acu n ttawil n usejji uɣur tessawed tujjya ass-a? Asejji yettemgarad seg tewsit ɣer tayeḍ, seg uswir n waṭṭan ɣer wayeḍ, maca s umata acelleqluq icudden s anerni n tmellalt ur t-ittudawi ara imi yettṛuḥu s wakud, maca llan wid yettakken tihurmunin (hormones *pilule*) akken ad tṣeggem tarda n tmeṭṭut. Ma d asejji n ucelleqluq agmaman s umata d acerreg (chirurgie), ama s twakksa n ucelleqluq kan, ladɣa ɣur tin werɛad nesɛi dderya ,neɣ s twakksa n waskiw i meṛṛa ɣur tin iɛeddan 50 n yiseggasen. Taggara. Acelleqluq n waskiw, d aṭṭan yeddan ass-a di tmetti. Ɣef waya, yessefk ɣef yal tameṭṭut ɣas ur tesɛi kra n ccirat icudden ɣur-s, ad terzu s amejjay, ad texdem l’échographie n usefqed akken ad tekkes aɣbel. U ma yeḍḥa-d tesɛa acelleqluq agmaman? ad t-id-tekkes ɣef zik lḥal uqbel ad yeldi tawwurt i lkunṣir.
Sali Dali