I lmend n usmekti n tmettan n umedyaz ameqqran Si Muḥ u Mḥend, axxam n yidles Mulud Mεemri n Tizi Wezzu ihegga-d yiwen wahil n ssin sussan. Zyada γef timsikent n yidlisen yettwarun fell-as ama s tmaziγt neγ s tefrensist, llan-d yisaragen. Ihi, gar wid i d-yewwin awal γef Si Muḥ u Muḥend, yella Abdennour Abdeslam. Uqbel ad yebdu asarag-is, Mass Abdeslam yenna-d :’’i wakken ur d-nettεawad ara asewwi i yiγsan, meḥsub d nekk kan ara yettmeslayen am zik, ass-a ad yili umeslay d adewenni, ad neεrḍ ad nemmeslay γef Si Muḥ U Mḥend gar-aneγ.’’ Dγa akka i as-yefka azwel i usarag-a : yal mi ara ad iγer asefru, ad yessuter deg wid yellan din ad d-inin d acu fehmen deg-s, am wakken i ixeddem uselmad deg uγerbaz. Acu kan da tella tlelli n umeslay, yal wa yefka-d rray-is d wayen yettwali. Ma d asteqsi yeṭṭfen lbal n waṭas n yimdanen d ’’ amek ssawḍen medden ad cffun γef yisefra n Si Muḥen u Mḥend imi yiwet n tikelt kan i ten-id-yeqqar ?’’. Llan wid i d-yennan ceffun γef yisefra-s axaṭer yeqqar-iten-id sdat n tejmaεt, dγa mi ara ten-id-εiwden yal wa d acu iwumi yecfa. Ma d wiyaḍ nnan-d ceffun axater yessefruy-d ayen ttεicin ula d nutni. Mass Abdeslam yenna-d dakken yezmer yettεawad-iten-id netta imi ala di temlilit-is d ccix Muḥen u Lḥusin i d-yenna ur d-ttεawadeγ ara i usefru .Awal, yezzi, di&gamma,; γef wayen i yezmer usefru ad yesselmed i wid i as-isellen. Dγa γef wanect-a i d-yenna Mass Abdeslam asefru ‘’d ttawil swayes i nezmer ad nessin amezruy, yal tallilt, yeseḥbibir, daγen, γef wawalen i wakken ur ttengaren ara.’’ Si tama-nniḍen iwala dakken ulac amedyaz mebla sebba, u sebba n Si Muḥ tebda s tmenγiwt n baba-s. I usmekti, Si Muḥ u Mḥend yemmut ass n 28 di duğember 1905.
Hocine. M