22 n tudrin gar 24 i tesεa tγiwant n wizgan i d-yemlalen ddurt-agi yezrin ass n 23 dujember 2011, deg uxxam n yidles n Lkulunel Muḥand Ulḥağ i d-yezgan di taddart n Wizgan γef demma n uslali n tiddukla n tudrin n tγiwant n Wizgan. Iεeggalen n tesquma n tudrin i d-yusan γer unejmuε-agi s rran tajmilt i tesqamut n taddart n Wizgan i d-yessudsen leqdic-agi i yesεan azal meqqar.
Iswi n timlilit-agi, am wakken i t-bɣan yiεeggalen n tudrin merra, d win ara yilin berra i unnar n tsertit, d ttawil i s ara d- rren iseγ d tegmat gar tudrin d uzeṭṭa n tegmat gar yimezdaɣ-nsent.
Syen, bedren-d uguren tettidir tγiwant n Wizgan si timmunent almi d tura, d ayen i yessawḍen wid iḥeḍren i unejmuɛ ad d-wwten s leqsaḥ γef Tadbelt (Administration) i yesselḥayen taγiwant, imi d tin ur nqeddec ara i lfayda n tγiwant d yimezdaγ-is.
Tisquma n tudrin bγant merra s tiddukla-agi, ad ḥarbent γef yizerfan n tγiwant d tudrin- is, am wakken i bγan sya d afella, ad mεawanen d yimḍebren n tγiwant akken ad ddun deg ubrid n unegmu, taneflit d usnerni, d tukksa n miḥyaf.
Γer taggara, iεeggalen n tudrin gezmen-tt di rray, d akken ad yiliu unejmuɛ di yal taddart I usqerdec n rray-agi. Syen, yal taddart ad d-tesbedd 02 n yiεeggalen-is, ara yekkin deg unejmuε ara d-yilin ass n 13 yennayer 2012 deg uxxam n yidles n Lkulunel Muḥand welḥağ neγ axxam n yidles Ferrat Ramḍan iwakken ad d-slalen s wudem unṣib tidukkla n tudrin n Wizgan.
Islam Bessaci