Ass n sem 11 di yebrir 2015, tekfa teɣlamt tasnajyant i d-yerzan ɣer temnaḍt n At Smaεel, anda yewweḍ wuṭṭun n wid i d-yeddan ɣef yimsujjiyen azal n 1800 n yimdanen. Uṭṭun-a yugar s kraḍ n tikal ɣef tirza-nsen ɣer temnaḍt n Iɣil Aεli; anda deg Iɣil Aεli yewweḍ 600 n yimdanen.
Taɣiwant n At Smaεel tεac ass d amerbuḥ s teɣlamt-a, anda i d-ddan deg-s aṭas n yimazzayen immuzag deg tujjya, ad d-naf deg-sen: imsujji n wallen, imsujji n tlawin, imsujji n yigerdan, imsujji n wul, imsujji n yeɣsan…Akked yinelmaden yettafaren assileɣ asnajyan deg tesdawit n Bgayet. Iεeggalen n useqqamu aɣerfan n tɣiwant qublen leqdic-a, s yiwen n lferḥ d ameqqran, ula d iεeggalen n tdukkliwin i qqedcen deg tɣiwant fkan-d afus n tallelt i leqdic-a; imi ḥsan, umnen s wazal yesεa leqdic-a deg tmetti. Tirza-ya n teɣlamt tasnajyant ɣer temnaḍt n At Smaεel ur d-telli ara, kan akka maca, llant deg-s tewtilin: lexsas n yimsujjiyen yimgaraden, lexsas n wammas asnajyan. Daɣen tettwaxtar tɣiwant n Yismaεliyen ilmendn tarakalt; imi tebεed aṭas ɣef waɣir n Bgayet s wazal n 75 km. Daɣen tebεed ɣef wammas asnajyan; ama d win yellan deg Xerraṭ, neɣ deg Umrij s wazal n 18 km. War ma nettu azal tesεa temnaḍt-a deg leqdicat yimgaraden; ama d adelsan, addalan, tawennaḍt.Taɣiwant tebded-as i leqdic-a akken ilaq; ama d ayen yerzan ammas anda gan leqdic-a, d ne$ d allalen smersen, ula d tuččit tella akken iwata lḥal. Ma d iεeggalen n tdukkliwin yellan fkan-d afus n tallelt, bedden akken iwata i yinebgiwen.
Nacer-AKOUCHE