Amezruy n wasmi terγa taddeart n Tewrirt, taγiwant n Wizgan ass n 11 γuct 1871 mazal yersex deg wallaγen n yal tasuta d yimezdaγ n temnaḍt n Wizgan s umata, imi yal amdan yesεan tigzi neγ win iwumi tejhed cfaya, ad as-innin « Tecfiḍ-d i wasmi terγa Tewrirt », dγa imdanen akk gzan s talluft n truγi n Tewrirt sγur lεeskker n tmurt n Fransa. Maca, ass n sebt 30 yulyu 2016 n ddurt yezrin, imezdaγ n temnaḍt n Wizgan d temnaḍin i as-d-yezzin, dren tallit-ni n wasmi terγa Tewrirt, 145 n yiseggasen mbaεd. Taddart Tawrirt n tγiwant n Wizgan tedder yiwet n teswaεt yuεṛen nezzah. Sebba, d tmes meqqren i yekkren di teẓgi n taddart-agi almi tekcem γer daxel taddart, anda imezdaγ n tudrin, iγallen n usellek, takebbanit tazzayrit n wamman (ADE), ixeddamen n 04 n tγiwanin Wizgan, At-zikki, Illulen Umalu akked At-Yeğğer, fkan-d afus n tallelt almi ṣawḍen sexsin times. Acu kan times-agi, tegla-d s lemḍara meqqren imi ddeqs n tjur n uzemmur i yuγalen d iγiγden, tamettant n lmal, izamaren d tγeṭṭen d tizizwa. Ma yella d lexṣara di tarwiḥin n yemdanen ulac, llan kan kra n yimejraḥ d wid iḍaqqen s dexxan.
Si tama-nniḍen, ddeqs n temnaḍin-nniḍen i yeddren ussan iweεṛen aṭas deg tallit-agi n unebdu, ladɣa, deg waggur-agi n γuct s sebba n tmes i yebdan tecεel deg yal amḍiq u mazal tettenfufud ar ass-a. Ayen yeǧǧan tiṣeddarin n lḥamu ulin-t s waṭas. Ddeqs n tẓegwa i yerγan, yečča-tent ujajiḥ n tmes, d ihigtaren n tzemrin i inegren, d ayen ara yeǧǧen zzit, asafar-a swayes ttidirent acḥal n twaculin di tmurt n leqbayel, ad yiɛziz, ad yeɣlay.Gar waya, d isufa i tedhem tmes, ɣer tama n uxerrub d yisekla-nniḍen. Ula d tizizwa ur slikent ara imi mačči drus n teɣrasin i yerɣan. Ulac tama i tezgel tmes, ama deg Wat Yeğğar, Illulen Umalu, Ifiγa d waṭas-nniḍen. Limer mačči d iɣallen n laman akked yimdanen iɛerḍiyen, ula d ixxamen ad rɣen ! Deqs n yihigṭaren i tečča tmes gar yisekla i d-yettakken lγella d wid-nniḍen. Lixsas n ttawilat iwulmen yeǧǧa iɣallen n usellek ur zmiren ara ad tt-ssexsin imi ulac aṭas n yiberdan i seg ara ɛeddin. Acu kan yewwi-d lḥal akken ad nḥezzeb, imi qqaren ‘’aḥezzeb yugar leqḍaε’’, i uḥareb γef twenaḍt d wayen i d as-d-yezzin.
Islam Bessaci