Tikwal, yezmer ad yili ustehzi d afessas deg kra n yiḥricen, meḥsub ur d-igellu ara s lemḍarra tameqqrant, ad yettuneḥsab kan d astehzi. D acu kan mi ara yili ustehzi yeɛna tarwiḥt n umdan, wagi yettuneḥsab d amgerdt. Bab-is ulaq ad yettwaḥaseb fell-as. Neɣ meqqar ad as-d-afen tifrat sya d afella i wakken ur d-ḍerrunt ara tiyaḍ.
Deg yimalas yezrin, teḍra-d yiwet n twaɣit i d-isersen leḥzen ameqran deg yiwet n twacult izedɣen deg Ain Bessem. Di leɛmer-is 41 n yiseggasen, tameṭṭut-a truḥ iwakken ad terbu deg sbiṭer n temnaḍt-a ideg I tezdeɣ. Maca, mi tt-ssawḍen ɣer din, ufan dakken ulac amejjay yetxeṣṣen i wakken ad d-yelhi yid-s. D ayen I yeǧǧan imḍebbren n sbiṭer-a ad tt-ceyyɛen ɣer…M’chedallah. Yeɛni ad tɛeddi ɣef Tubiret, i wakken ad ternu azal n 40 ikilumitren iwakken ad taweḍ ɣer Mayu. Deg ubrid, imi lḥal-is iḥar, abrid ɣezzif, tameɣbunt-a ur tessaweḍ ara rruḥ ɣer sbiṭer anda I tt-ceyɛen, temmut deg ubrid gar yifassen n wid I tt-yewwin. Dɣa din I yendeḥ unadi ɣef tmettant-is, meɛna aɣbel meqqren, d acu yessawḍen ɣer liḥala yecban ta anda sbiṭer yecban win n Tubiret ur yesɛi ara imejjayen ara yettukelfen s tid ara yerbun. Daɣ, amek ara d-tas tmuḍint-a seg Ain Bessem alamma d M’chedallah, yeɛni seg Umalu s asammar, u nettat deg liḥala yenṭerren. D ayen I yesserfan mačči d kra ama d imawlan n tmeṭṭut ama d imdanen-nniḍen i yugaden ula d nutni ad d-ɣlin deg temcukkal yecban ti.
S. M