D anwa d wa ur nḥemmel izeǧǧigen, d anwa ur nebɣi ad yettwali tugna-nsen-nni tacebḥant yerḥan allen. Niḥqa, iban yal yiwen seg-neɣ yehwa-as uzeǧǧig s yisenfan i yesɛa d yiniten-is (couleurs) daɣen. Acku, izeǧǧigen s umata, ttakken-d ula d nutni amur-nsen n ubaɣur i ugama d tudert n umdan. Maca yesḥissif lḥal aṭas imi mgaradent tmuɣliwin ɣef uzeǧǧig : yal wa amek i t-iẓer. Llan wid ur nessin d acu i yezmer ad d-yessenfaɛ seg yizeǧǧigen d ccbaḥa-nsen imi ur ttqadaren azal-is, ur xeddmen ayen iwatan fell-as.
Nerra tamawt deg tmurt-nneɣ ṭṭuqten wid i ten-ikesben deg yixxamen-nsen, teẓẓan-ten akken ad behhin yis-sen tizniqin… Wanag tikwal, ttilint-d teswiɛin ideg stehzayen lɣaci, lxalat neɣ irgazen s yizeǧǧigen-nni, ur lehhun yis-sen swaswa. Aya iḍerru imi tettun ahat medden belli amek sran nutni s timmad-nsen i tgella, aman d wayen-nniḍen akken ad idiren, ad zemren ad ḥerrken ad qedcen, ad gen ayen i asen-d-tessutur tmeddurt n yal ass. Ula d azeǧǧig ilaq ad xedmen leḥsab-nsen fell-as. Yessefk ad ḥsun dakken am yimɣan akkit, azeǧǧig yesra i win ara yelhun yis-s bac ad d-yefk seg tama-s ayen yettraǧu umdan sɣur-s.
Rnu, acimi ɛni di berra, drus maḍi i yellan d imukan n uzeǧǧig? Ad ttnuzun deg tḥuna, neɣ ad ttwaẓẓan deg yiberdan i ccbaḥa d tfenda (rriḥa). Ilaq ad ftin deg xilla n yidigan, ad ttwawfen yal mi ara ten-yeḥwaǧ yiwen, acu kan deg tidet xussen. «nruḥ d agraw ad nerzu s axxam n Lwennas Meɛtub, ad nẓur aẓekka-s. Deg ubrid nemmekta-d ad nawi yid-neɣ izeǧǧigen ad ten-nesres ɣef uẓekka-s-nni. Neḥbes deg kra n yimukan nesteqsa ma ttnuzun ad d-naɣ, lameɛna ur nufi ara. Dɣa, nesḥassef ass-n imi nruḥ war ma newwi-ten». I aɣ-d-yenna yiwen seg Ayt Smaɛel. Akka ihi, yettban-d ɛinani lexsas n wadeg n uzeǧǧig di tmurt-nneɣ. Lemmer zun ad ilint tḥuna, ad ttnuzun yizeǧǧigen di yal amḍiq, imi ccbaḥa-s tuklal ama d leɛtab fell-as, ama d adrim.
Kaïsa Khalifi