Sendiḍelli n ssebt, 7 deg waggur-agi n yebrir ideg nella, ɣef 14h00 n tmeddit, tella-d temlilit deg Uzday adelsan Rahmani Slimane n Aokas deg lwilaya n Bgayet. D timlilit ideg i d-yemmeslay aselmad n tmaziɣt deg tesdawit n Abderrahmane Mira n Bgayet akked uneggal aqbayli Lahdir Sidali, yezzi wawal deg usarag-agi-ines ɣef wungal-is amezwaru “Tirga n wul”. D tagnit ideg i d-imeslay i wid iḥemmlen tasekla tamaziɣt ɣef tegnatin n tira n wungal-agi d wayen akk i icudden ɣur-s, am wakken daɣen i d-yexdem agzul awezzlan n tedyant n wungal-agi. Yehder-d diɣen s umata ɣef wungal-agi-ines “Tirga n wul”, ama ɣef wayen yeɛnan awdem agejdan (Sima) n wungal-agi akked yiwudam-nniḍen yellan deg-s. Yewwi-d daɣen awal ɣef tira n wungal s teqbaylit d tirmit-is netta imi s timmad-is d aneggal. Yella-d daɣen uskasi sɣur wid i iffuden tamussni d yidles, ma d netta yeɛreḍ amek ara d-yerr akk i yisteqsiyen i d as-yettunefken ɣef teɣzi n ssaɛa. Ad d-nesmekti kan belli Mass Lahdir Sidali, d aselmad n tutlayt tamaziɣt deg ugezdu n tutlayt d yidles amaziɣ n tesdawit n Targa n uzemmur n lwilaya n Bgayet, yesselmed daɣen deg yiwet n tesnawit ddima deg lwilaya n Bgayet. Tura akka, yettekemmil tizrawin-ines deg tesdawit n Mulud Mɛemmeri n Tizi Uzzu, imi yettheggi agerdas n Doctorat deg tsekla tamaziɣt. D “Tirga n wul” i d adlis neɣ ungal-is amezwaru, yeffeɣ-d deg waggur-nni n meɣres iɛeddan ɣer tezrigin Tafat n Bgayet.
Ghani Amazigh