Di tirza-nneɣ ɣer At Xir, anda d-tella rreḥba n ufexxar, nemlal d Abderaḥman Dinar, anazur aɣerfan, amurar n l’accordéon. Nufa-t iṭtef amkan gar temzikniyen, yetturar, lɣaci ttnezzihen-as. Yuɣal-d sser tamurt, ddeqs aya ur nwala ara inazuren icban wigi, inazuren n «yizenqan», wid itturaren agitar, neɣ abyulon, neɣ allal nniḍen, imeddaḥen , imedyazen issawalen tamedyazt deg yizenqan neɣ di leswaq. Nnejlen ass-a neɣ snejlan-ten. Anda llan imedyazen iɣerfanen am Muḥend U-Yidir, i issawalen tameyazt deg uzniq di Tizi neɣ di ssuq deg wass n ssebt. Anda yella ucennay aɣerfan Hend n yiɛeẓẓugen i itekksen lxiq i lɣaci s tgiṭart deg yizenqan n Tizi neɣ n Lezzayer. Netta dɣa, mi t-id- ufan yimsulta, icennu deg ubrid, ad t-awin ɣer lkumisarya. Yezga icennu deg uzniq, sdat tesdawit n Lezzayer. Yiwen wass, ufan-t-id icennu sdat la «Fac centrale», dina di Lezzayer wwin-t, rẓan-as tagiṭart-is ssbaḥ, tameddit-nni kan mi as-id sserḥen, yuɣ-d larmunika, yuɣal ɣer uzniq. Anda llan wid icebḥen ibarden, i tekksen si lxater, itekksen lxiq i yimsebriden ? Anda llan, anda! Mi nufa Abderrahmane Dinar yetturar l’accordéon, lɣaci zzin-as, ttnezzihen, necraḥen wudmawen nefraḥ nezzeh, nemmekta zzman, nemmeka-d inaẓuren n yizenqan, nemmekta-d Hend … Mazal ziɣen ur ngiren ara. Yella Abderahmane Dinar n Umazul, anazur n At Frawsen. Yusa-d ɣer At xir, necden-tid imḍebren n rreḥba n ufexxar akken ad icebbaḥ tesweɛt. Mi t-nemlal nesteqsa-t d acu t-yewwin ɣer wallal n l’accordéon. Yenna-d : «Seg wasmi waleɣ di tilibizyu l’accordéon, sliɣ i sṣṣut-is, ikcem ul-iw, iɛjeb-iyi aṭas. Tamezwarut deg i t-nuleɣ, i t-ṭṭfeɣ gar yifassen-iw, ufiɣ-t deg uxxam n yidles Mouloud Mammeri deg Tizi-Wezzu. Yewwi-t-id yiwen, yetturar yis. Din din bɣiɣ ad sɛuɣ yiwen. Nudeɣ anda ara t-afeɣ i lbiɛ ulac, mačči aṭas i yetturar l’accordéon. yiwen wass, ufiɣ-t deg l’Artisanat deg Tizi-Wezzu, uɣaɣ-t-id xas akken mazal ur ssineɣ ara ad t-urareɣ. Acukan, bbakken ḥemleɣ allal-agi, ur ɛeṭṭleɣ ara lemdeɣ. Tura ssneɣ-t mliḥ alammi d nekk i t-ixedmen mi ara ixser kra deg-s. Tturareɣ yis deg yizenqan, di tmeɣriwin n taddart neɣ mi ara iyi-nnecdent tdukkliwin tidelsanin am tagi n At Xir. Lɣaci ḥemlen ad slen i l’accordéon, ur uɣen ara tanumi ttwalin-t. Yal tikkelt mi ara yi-d-necden, ttruḥuɣ tturareɣ baṭel, lfarḥ-iw, mi ara waliɣ wid ittnezzihen ferḥen. Mi ara d-yas webɛaḍ n yicennayen, sutureɣ deg-s ma yebɣa ad t-ḥamiɣ s l’accordéon. Aṭas n yicennayen akked urareɣ, seg-sen yella Aɛli Meẓyan. Iḥemmel aṭas l’accordéon.». Akka i t-id-yenna Abderahmane «lfarḥ-iw, mi ara waliɣ wid iyi-ttnezzihen ferḥen», akka i itekkes cwiṭ umdan si lxater-is, i tettili tumert, i tettiẓid tudert.
R.LASHEB