Mustapha Ait Moussa d ajenyur uqbel ad yuɣal d asleɣmay n waddal s uẓawan, yewwi-d sin yigerdasen deg tmurt n Fransa. Yuɣal-d s snat n tarrayin: timsirin timazdayin (cours collectifs) akked tamsirt n usluɣmu n wul (cours de cardio-tarining).
Aɣmis n Yimaziɣen: Di tazwara ini-aɣ-d amek tḍefreḍ annar-a i yerzan addal?
Mustapha Ait Moussa: Ɣef wakken i d-cfiɣ, seg wasmi sɛiɣ ahat 6 yiseggasen, nekk ur ḥbiseɣ addal ar ass-a. Asmi d-wwiɣ agerdas n ”Bac», niqal ad kecmeɣ ɣer yiwet n tesdawit anda lemmden yislaɣmayen n waddal, di Lezzayer(El Biar) isem-is imir-n ISTS, syin akin ḍefṛeɣ abrid n takrura (sin yiseggasen di Tizi, 3 di Lḥeṛṛac: polytechnique). Mi d-wwiɣ agerdas n ujenyuṛ, ṛuḥeɣ-d ɣer tmurt n Fṛansa (tamdint n Rennes) anda xedmeɣ agerdas n DEA. Syin akin sslemdeɣ sin yiseggasen takrura, tafizikt akked tusnakt (aɣerbaz alemmas/tasnawit). Syin akkin yuɣal-iyi-d lebɣi n uselmed n waddal, ihi heggaɣ-d sin yigerdasen.
Tesseḥfaḍeḍ sin yisenfan n waddal, mmeslay-aɣ-d ɣef umgarad yellan gar-asen?
Ahil-agi d-ttheggiɣ di Paris d timsirin timazdayin (cours collectifs) anda ara ilin gar 10 d 15 n iɛeggalen. Ssenf amezwaru qqaren-as s tefṛansist “Circuit training», tagi d tarrayt anda nezmer ad nesseqdec akk tafekka s kra n yiluɣma (gar 6 d 10 neɣ ugar) wa s deffir n wa. Ssenf-agi yezmer ad t-yexdem win yesɛan tirmit deg waddal, neɣ win ur nesɛi ara maḍi. Deg ssenf-agi, leqdic d win igan tagada gar usmeẓwel (musculation) akked usluɣmu n wul (cardio-training). Ssenf wis sin, d tamsirt n usluɣmu n wul (cours de cardio-training). Dagi ad ttwasnin yiluɣma(n umbiwel d uneggez) am uzrar (chorégraphie). Aẓawan ad yili iserreḥ I wakken ad yali uswir n uḥebbek n wul. Tarrayt-agi tessekfal-d tidi, yerna tettban-d am ccḍeḥ, ɣef waya telha aṭas i win yebɣan ad yenqes di taẓayt neɣ ad yesnerni kan deg yifadden-is.
D acu-tt nnuba i sɛant timsirin-inek n waddal deg tdawsa neɣ deg tfekka n umdan?
Addal d allal yesnarnayen tazmert n tfekka. Ur ilaq ara ad nwali kan tafekka am teklut.Tahuski n tfekka tesɛa azal mi ara d-teddu yid-s tdawsa. Ihi, addal yelha aṭas i tfekka acku yessimɣur lǧehd n wul, yettgerriz tasnisnit(circulation) n yidammen, yettak daɣen afud i yifessugen I wakken ad zdin yiɣsan n umdan.
Tenniḍ-d dakken tebɣiḍ ad teskecmeḍ ula d aẓawan azwaw di leqdic-ik…
Ih, aṭas aya segmi i as-qqareɣ yessefk ad sqedceɣ aẓawan aqbayli, amaziɣ s umata, deg temsirin n waddal. Tanekkit-nneɣ ilaq ad tili deg yal aḥric n tmeddurt. Nesɛa aẓawan iwulmen i waya, ayɣer ad t-neǧǧ kan i tmeɣṛiwin? Yewweḍ-d wakud anda ilaq ad nessekcem idles-nneɣ ula deg uzwu n turin-nneɣ.
D anta d tiɣri i ara tegreḍ s yisem-ik d asleɣmay akken ad gren wiyaḍ deg wayen txeddmeḍ? Ladɣa imi lecɣal am wi ur ṭṭuqten deg tmurt.
Ɣas ad as-d-alseɣ tikkelt-nniḍen, ad d-iniɣ dakken addal d tazmart n umdan. D addal i ixeddem win yettembiwwilen, iteddun, yettalin, yettṣubbun, ireffden tiɣawsiwin, iqeddcen s yiɣallen-is, s tfekka-s. D tiɣimit kan s waṭas i dir. Ma tella yiwet n tiɣri ad tt-id-greɣ d ta: nettwali di tmetti taqbayli ass-a belli tudert n umdan tettnerni seg tsuta ɣer tayeḍ. Wagi neẓra ansi d-yekka. Učči war ambiwel yettawi-d taẓayt i umdan. Aya-agi yettban-d abaɛda ɣer tmeṭṭut taqbaylit. Zik tameṭṭut ur tesɛi ara allalen itraren di tudert-ines, ihi ur tḥebbes deg leqdic, deg tazzla, deg uɛebbi, seg tafrara alamma yeɣli yiṭṭij. Tura tawuri teshel maḍi, neɣ ad d-nini ur tewɛiṛ ara am zik. Tafekka terked, leqdic fessus, ayen ntett ur yettuɣal ara d afud (Energie), nesnernay deg yikiluyen alamma nufa-d iman-nneɣ nuɣal d icekkaṛen. Taẓayt diri-tt i tdawsa, ul iɛeggu, aɛrur yettwaɣ, idammen ur teddun ara akken iwata! Ihi, d argaz neɣ d tameṭṭut, ttmeyyizet deg wayen tesseblaɛem, abaɛda tiẓidanin. Ur tettut ara addal, deg uxxam, di tzeqqa, deg uɣerbaz, deg beṛra… Anda tebɣam, xersum snat n swayeɛ di ddurt.
Tanemmirt a Mass Mustapha ɣef tririyin i d-tefkiḍ. D acu-t wawal-ik n taggara?
Tanemmirt-inem a Kayisa imi i yi-tefkiḍ tagnit i wakken ad d-mmeslayeɣ ɣef leqdic-inu, ɣef waddal s umata, ɣef wayen i d-yettawi i tdawsa n umdan, i tdawsa n ugdud. Afud igerrzen!
Testeqsa-t: Kaissa Khalifi